Football bazara tawng kam hman lar

Football-a bazar hun rei lo zawk; Thlasil bazar a inhawng mek a. Football club hrang hrangin an player duh zawng lak tumin hma an la a. Football club thenkhatin an player chhawr tangkai tawh loh chhuahtir tumin hma an la ve sung sung bawk. Football bazar inhawn lai a ni bawk a, football bazara tawng kam hman lar zual kan tar lang leh ang.
Football huangah hian a nawlpuia player lei leh hralh theihna hun pui pahnih a awm a. June 14 – 1 September hi ‘Nipui Bazar’ tih a ni a. Nipui bazar bakah hian January-ah thla khat chhung bazar theihna hun hawn leh a ni thin a hei ‘Thlasik Bazar’ tih a ni ve thung. Football bazar-ah hian tangkam hman lar deuh deuh a awm a, tun tumah hian a langsar zual kan tarlang ang.
Add-ons : Player leina man pek tlak nghal vek loha, pek belh leh theih tura inremna an ziahtel thin hi Add-ons tih a ni. London club lian Arsenal in West Ham United atangin England midfielder Declan Rice an lei dawn a. Arsenal leh West Ham te hi Rice manah Rs. 50000 in an lo inrem ta a, Rs. 50000 hi vawi khata pek tlak nghal kher loh tura an inrem vangin Arsenal hian West Ham hnenah an inremna angin Rs. 40000 an pe phawt ang a. A hnuah Rs. 10000 an pe leh ang. Hei hi Add-ons kalphung chu a ni.
Add-ons chungchangah hian inremna mumal tak an nei lawk thin. Player an lei thar khan chumi chhungin chuti zat chu a khel tling tur a ni tia inremna a awm thei a. Player an lei thar khan chumi hun chhung chuan goal chuti zat a thun tling hman chuan tihte emaw, hlawhtlinna eng emaw tal a chanpui tur a ni tih emaw in inremna an nei lawk a. Beisei anga an player lei kha a chetha lova, an target a tlin lo a nih chuan add-ons hi pek kher ngai lo a ni ve leh thei thung.
Agent fees:
Football player hrang hrangte hian an aiawha mi dawr tur agent an nei thin. Heng agent hrang hrangte hian player lei leh hralhna atangin hlawkna an lo tel ve thin a, chu chu ‘Agent fees’ hi a ni.
FIFA chuan Agent fee chungchangah hian dan a siam thar a, dan thar berah chuan player lei nana £168,166 chin chung lamah agent ten 3% an chang thei a. £168,166 chin hnuai lamah chuan 5% an chang thei thung. Club hrang hrangin player duhzawng bik an nei thin a, an player duhzawng an lak luh a, an hnen pan tura an hmin theih nana pawimawh hmasa chu player te agent an ni a. Agent te hi an pawimawh a, club ten an titha viau thin bawk.
Buy-back clause
Player an hralh tawhte an lak let leh theihna dan hi ‘Buy-back clause’ chu a ni.
Football club ropui Real Madrid chuan an midfielder (Manchester United tana khel mek) Casemiro chu FC Porto hnenah an hralh a. Casemiro chungchangah FC Porto nen an inremnaah hian Real Madrid in an lei let leh theihna tur thutlung an ziak tel a. Inremna an lo neih tawh angin Real hian $10m vel bawrin an lei let leh ta reng bawk. Club thenkhatin an player, a bikin kum la naupang deuhte an hralh hial Buy-back clause hi an ziak tel chawk a. A taka hmang erawh an tam lo thung.
Manchester City hian an forward pawimawh Erling Haaland hi Arsenal hnenah hralh ta a, an inremnaah City hian Rs. 100 in an lei let leh thei ang tih lo ziak tel ta bawk se…Arsenal in Haaland an hralh leh duh a nih chuan City hian an duh an nih chuan Rs. 100 hian an a let leh thei ang a, Arsenal tan City hi ngaihchan hmasak ber an ngai. An duh kher loh chuan club dang hnenah to zawkin an hralh thei thung ang.
Financial Fair Play (FFP)
UEFA financial regulation (Financial Fair Play) hi kum 2009 atang khan hman tan an niin, football club te sum lak luh leh an sum hman a inbuk tawk theih nana ruahmanna siam a ni. Lak luh aia hmanchhuah tam lutuk tur venna dan tiin a sawi theih bawk.
He dan an ruahman thar tirh kha chuan club in sum an lak luh atanga 90% hi agent fees, bazarna leh player te hlawhah sen phal a ni thin a. Tunah chuan 70%-ah tihniam a ni tawh thung. FFP bawhchhiah an awm a nih chuan kum thum chhung player thar lei thei lo turin hrem theih an ni a. Kum thum chhung ngawt player thar lei theih loh hi a pawi tham em vangin club lian ten hrem nih an hlau viau thin.
Free transfer
Player hrang hrangte hian hun bituk neiin club-ah contract an ziak thin. An hun bituk, an contract in a huam chin an hman zawh chiah khan player zalen an lo ni ta a, chu chu free transfer a ni a. Club vawn nei lo an nih vangin player lei nan sum sen a ngai ve lo. Player lei nan sum sen a ngai lo naa player hlawhah club in sum an sen erawh a ngai ve tho thung. Lionel Messi chuan kum 2021 khan Barcelona-a a contract a hmang zo va, free transfer in PSG a zawm. PSG hian Messi lei nan Barcelona hnenah pawisa an pek a ngai hauh lo naa, Lionel Messi hlawhah hian $70m an seng tho thung.
Loan
Club in an player chhawr tangkai loh club dangah inchherhriam turin an chhuahtir lailawk thin a, a ngheta lak ni lova player an lo hawh lailawk hin hi loan chu a ni.
Club hrang hrangte hian an rawlthar player, an hnena khelhna hmun la chang tam thei si lote club dang, an khelh tam theihna turah an tirchhuak thin fo thin. Loan a player lak hi a tam zawk chu kum naupang zawk an ni tlangpui. Chuti a nih loh chuan player hlawh hnem, an hnena khelhna chang tam thei si lo, hlawh an pek teuh teuh site, hlawha an sen tam lutuk phuhruk nan an tirchhuak thin bawk. Loan a an chhuahtir hian an va khelhna, an mahni hawhtu ten an hlawh an lo pe tlangpui a. Chhuahtir an duh em vangin hlawh chanve tumsak chunga chhuahtir an awm tho bawk. Chuan loan-a an zawm hun chhung a tawp rualin an club pangngaiah an let leh mai thin. Club thenkhatin an player hawh an la nghet duh a nih chuan chuti zat chuan an la lut zui thei ang tih thutlung an ziak tel ve fo thin bawk.
Personal terms
Player man leh mualah club pahnihten inremna lo nei ngawt pawh nise mimal inremna (Pernonal term) an neihpui theih si loh chuan an in la lak theih loh phah ve fo thin. Personal terms a langsar em em pahnih chu hlawh leh contract rei zawk a ni. Hlawh hi club leh player te inremna lohna mutan lian tak a tling. Personal term vanga indawr zikzuak thei lo an awm laiin, club pahnihten inremna an neih hmaa mimal inremna lo nei lawk sa pawh an awm ve tho bawk. Personal term hi contract thar an ziah leh dawnah a pawh a pawimawh leh viau thin bawk.
Release clause
Club in player an lak luh a, contract an ziahpui hian an hralh huna an hralhna zat tur biktuk ziahtel a ni ve fo thin a, chu chu Release Clause chu a ni.
Spain-ah bik phei chuan player tinten release clause an nei vek tur a ni a. An lakchhuah theihna zat an biktuk anga lei ngam an awm a, player in chhuah a duh bawk chuan club tan dan theih an ni lo. Barcelona player pawimawh Neymar kha a lakchhuah theihna zat atan $267m dah a nih vangin hetiang zata lei ngamtu PSG in an lei nawlh mai a ni. Arsenal in Atletico Madrid atanga Thomas Partey an lak pawh khan a lakchhuah theihna zata an lak ngam miau vangin Atletico Madrid an ui ngawih ngawih chungin Arsenal a pan. Spain-ah chuan release clause-a player lei ngam an awm chuan La Liga thuneitute hnenah an thlen mai a, La Liga thuneitute thuin an chhuak thei teh tlat.
Club in player an lak luhin release clause ziak tel pawh nise release clause nun hun hi a awm hran ve leh a. Release clause hman theih hun hi kum hnih hnuah a ni thei a, kum thum hnu daihah pawh a ni thei tho bawk.
Hand in transfer request
Contract nei lai player in club dang zawm turin chhuah a duh a, club hnenah chhuah dilna a thehluh hi ‘Hand in transfer request’ chu a ni. Club dang pan chak ngawih ngawihte pawhin chhuah dilna thehluh em hi an thih hreh takin an hreh ve ngawih ngawih thin. Chhuah dilna meuh an thehluh tawh chuan club pawhin an ngai thutak em em a, an chhuah duhna club nen inremna neih dan kawng an dap ve sawk sawk thin a, chhuah dilna thehlut tawh player te chu dan an tum buai tawh ngai lo.