Footballer hausa zual pasarih
Khawvel huapa infiamna lar leh ngaihsan hlawh berah football a chhal ngam ang. Football thiamte chuan an mahni khuaah ngaihsan an hlawh a, khawvel huapa thiam filawrte phei chu an ropui zual em em! Footballer ropui tak tak an lo piangchhuak tawh a, tun tumah chuan khawvela football hausa zual nia Sportskeeda in a tarlan pasarihte kan tar lang ang.
7. Kylian Mbappe
Paris St-Germain leh France forward pawimawh Kylian Mbappe hi kum 24 chauha upa a ni a, khawvela footballer hausa zual pasarih zingah a tel phak der tawh. Mbappe hausakna hi US Dollar 180 million niin chhut a ni.
Forward tlanchak, ball thiam, finishing tawih bawk si Mbappe hi kum 2022 khan khawvel football club hausa ber Real Madrid in lak tumin an dawr a. Real Madrid a zawm dawn emaw tih hnuah rin loh takin PSG-ah contract thar a ziak leh ta zawk. PSG-ah hian kar tin £893,000 vel zet a hlawh a, bonus a dawn neuh neuh nen kar khata hlawh ringawt pawh a tam tham viau. Kum 24 mi lek a nih laiin footballer hausa zual zingah a tel phak tawh a, football a chawlhsan hunah phei chuan hausa lehzual hle tura ngaih a ni.
6. Zlatan Ibrahimovic
Footballer huaisen, luhlul, tawngkam thiam leh goal thun thei tak Zlatan Ibrahimovic hausak zawng hi $190 million vel bawr niin chhut a ni.
Europe-a club ropui tak taka lo khel kual tawh Ibra hian 2022-23 season tawp rual khan football a chawlhsan a, AC Milan atangin player anga a football zin kawng a zawh tawp. Club atanga hlawh sang tak tak a lak luh thin bakah Nike, Volvo, H&M etc., te nen an thawk dun a, hei hi a hausakna tipung nasatu an ni.
5. Neymar
Khawvela footballer manto ber ni mek, Paris St-German leh Brazil player pawimawh Neymar hi PSG player hlawh hnem zual zinga mi a ni a. Fakna hrang hrang atangin sum a la lut hnem hle bawk. Puma, Qatar Airways, Epic Games, Red Bull leh Triller te nen an thawk dun a, heng company hrang hrang atang hian sum hlawm lian a hai lut reng. Ball a thiam a, a style a mawi thei bawk nen lawm a hlawh viau thin. PSG leh Brazil forward pawimawh Neymar hausakna hi $200 million vel niin chhut a ni.
4. Dave Whelan
Blackburn Rovers leh Crewe Alexandra tan khel tawh thin, kum 10 chhung chauh professional huanga inlan Dave Whelan hian tunlai football khawvelah hriat a hlawh lo viau. Football a khelh laiin hausa turu tak ni phak lo mah se sumdawng lian a ni a, British a sumdawng hlawhting ber pawl a ni. Football a chawlhsan hnuin sum dawnnaah an insawrbing a, football club lian Wigan neitu niin, kum 20 dawn chu club chairman a ni nghe nghe a. Kum 2015 khan Wigan chairman a nihna a chawlhsan. Dave Whelan hausak zawng hi $210 million angin chhut a ni.
3. David Beckham
Footballer hmeltha, freekick pet thiam zet mai David Beckham hi tun thleng hian hmeichhia chuan an la star em em reng. Football a khelh laiin sum tam tak a la lut a. Football a chawlhsan hnuin sum-dawnna hrang hrang atangin sum a la lut hnem leh zual. Company lar tak tak H&M, Tudor, Haig Whiskey, Armani leh Breitling atangin sum tam tak a la lut a. Thawnhnaw siamtu lar tak Adidas nen dam-chhung thawk dun turin contract mawm tak an ziak a, a nasa bun atang ringawt pawhin sum tam tak a la lut.
David Beckham hian football a chawlhsan hnuin a ropuina football a ngaihven chhunzawm a. Major League Soccer club Inter Miami neitu zingah a tel a. Inter Miami hian khawvela footballer ropui ber Lionel Messi an la lut thar a. Messi an nei thar hian sumdawnna lamah pawh a thantir awk beisei a ni. Footballer hmeltha Beckham hau-sak zawng hi $500 million niin chhut a ni.
2. Cristiano Ronaldo
Manchester United, Real Madrid leh Juventus-a ropui taka lo khel tawh thin Cristiano Ronaldo hian hlawh atang ringawt pawhin sum tam tam a la lut thin. United a zawm nawn leh hnuin a ropuina nei let tawh lo mah se sum tamna Saudi Arabia club Al-Nassr a zawm a, hlawh tak fahran a hlawh zui leh. A hmel a tha a, a pian a nalh bawk nen Ronaldo hi khawvel hmeichhia te star rawn ber pawl a tling hial.
Footballer thawkrim Ronaldo hian a khelhna club ah hlawh tam tak a neih thin bakah fakna atangin sum hlawm lian tak a hai lut reng bawk a. Company lar tak tak Nike, Tag Heuer leh Clear te nen an thawk dun a. Hotel changkang tak tak a neih teuh bakah thawmhnaw siam lamah a inhnamhnawih thuk viau bawk. Footballer ropui sawi apianga sawi hmaih theih tawh ngai loh tur; ram tan khel hnem ber, goal thun hnem ber leh champions league-a goal thun hnem ber ni bawk Ronaldo hautakna hlut zawng $500 million angin chhut a ni.
1. Lionel Messi
Footballah ‘Greatest of All Time (GOAT)’ ti hiala an sawi Lionel Messi hi hun rei tawh tak atang khan khawvela footballer hlawh hnem ber pawl a lo ni deuh ngar ngar tawh a. Club in a hlawh an pek ngawt pawh hausak pui tham a tling. Company lay Adidas leh Pepsi atanga a sum dawn ngawt pawh tam turu tham tak a ni. Heng bakah hian Messi hian sumdawnna lian tak a kalpui bawk a, a hausakna hlut zawng hi $600 million zet niin chhut a ni.