Forbes Most Powerful Woman in the World list-ah Taylor Swift No.5 a ni

Forbes Most Powerful Woman in the World list-ah Taylor Swift No.5 a ni
Forbes-in an kumtin dana khawvela hmeichhe thiltithei zual 100 an thlan chhuah thin chu kumin atan a list an tichhuak leh ta a Taylor Swift, kum 33, chu No.5, he list-a a tawn san ber a la ni a, kumin list-ah chuan entertainment atanga lang zingah a thleng sang ber a ni bawk. He list-ah hian Beyonce leh Rihanna te pawh an lang. He list-ah No.1 chu European Commission President Ursula von der Leyen niin, European Central Bank President Christine Lagarde chu No.2 a ni a, US Vice President Kamala Harris chu No.3 niin, Italian Prime Minister Giorgia Meloni chu No.4 a ni.
Forbes chuan Taylor Swift hi billionaire-ah an puang tawh a, a hausakna hi dollar tluklehdingawn 1.1 angin an chhut a, touring leh royalty atangin dollar maktaduai 500 leh a music catalog atangin dollar maktaduai 500 bakah real estate atangin dollar maktaduai 125 nei angin an chhut a, hei bakah hian a Eras Tour ticket hralh that dan te leh a re-recorded album hralh kal dan te nena chhut vek a ni a, Forbes chuan Swift musician zingah rimawi kaihhnawih ngawr ngawr, sumdawnna dang tel lo, atanga billionaire ni thei hmasa ber niin an tarlang bawk.
Forbes list tharah hian Beyonce, kum 42, chu No.36 a ni a, ani hi nikumah No.80 a ni. Beyonce hian February khan Grammy dawn belhin, Grammy history-a award dawng hnem tawh ber a ni a, kumina Renaissance Tour a neih pawh a hlawhtling hle a ni.
Rihanna, kum 35, chu No.74 niin, ani hi a hausakna dollar tluklehdingawn 1.4 angin an chhut a, a sum leh pai zawngah chuan Swift leh Beyonce aia hausa zawk a ni. Ani hian rimawi bakah a Fenty Beauty leh Savage x Fenty company te chu a sum hmuhna lian a ni a, kumin Super Bowl Halftime Show-ah a perform bawk.
Kumin June thlaa Forbes-in America-a hmeichhia mahni kutkawih ngeia ding chhuak, hausa zual list a tihchhuahah pawh Rihanna hi No.20 niin, Swift chu No.34 a nia, Beyonce chu No.48 a ni bawk.
Forbes-in khawvela hmeichhe thil tithei zual list siam nana an tehna hmanah hian hlawm pali lian deuh a awm a- an sum leh pai thawh chhuah tam dan te, media lamah an lansarh dan leh mite an hneh theih dan te chu a pawimawh zual a