Sairang Dinthar Venga Food Corporation of India (FCI) in kudam a sak mekah forest clearance neih a ngaih avangin hna a tithuanawp a, clearance neih dil mek a ni.
FCI executive director (North East) DP Shukla leh hotu dangte chuan Thawhtanni khan Supply minister B Lalchhanzova hmu in, Mizorama hna an thawh dan leh mamawh tul an thlen a. An thlen zingah hian Sairang Dinthar Venga buhfai quintal nuai khat leng kudam an sak mekah forest clearance avanga an buaina chuan kudam sak hna a tithuanawp tih an sawi.
Minister chuan Land Revenue & Settlement hotuten he thil hi an buaipui sak mek a, compensatory afforestation atan ram an hmuhfel sak tawh tih a lo hrilh a. Forest department hotute hnenah FCI-in kudam sak an chhunzawm theih nan an thlawpna a phut tih a sawi thu lo hrilhin, Forest department pawhin theihtawp an chhuahpui tur thu an lo hrilh tih a sawi a ni.
Khawzawla FCI kudam (quintal 33400 leng) sakna hmuna lei nghet tawk lo nia sawi chu endik thuai a, a rang lama hma la turin FCS&CA minister hian FCI houtute a chah bawk.
FCI general manager Sandeep Deora chuan Dinthar Veng Sairang leh Khawzawla kudam sak zawh a nih chuan Mizoramah FCI-in vawikhata thla 8 eikhawp chhek khawlna hmun a nei thei dawn a, hei hian furpui leh khuarel chhiatna dangin rel leh kawngpuiah harsatna thlen mah se, Mizoram chuan buhfaiah thlaphanna tur a nei dawn lo tih a sawi bawk.
FCI hotute chu a tul anga Mizoram hmun laili deuhah kudam sak bellh dan ngauihtuah a tul tih B Lalchhanzova hian sawiin, FCI hotute chuan an lo bawhzui tur thu an hrilh a ni.
Minister leh FCI executiver director inkawmnaah hian FCS&CS, LR&S leh EF&CC department hotute leh FCI atangin Northeast leh Mizorama an hotute an tel a ni.
Forest clearance ngaih vangin FCI kudam sak mek thuanawp
Get real time updates directly on you device, subscribe now.