Kumin hian fossil fuels atanga electricity siam chhuah chu nasa takin a tlahniam dawn tiin report chuan a tarlang a, chu chu khawvel tana hun chhinchhiahtlak a ni tih a ni bawk.
Kumin hi a tum khat nana coal, oil leh gas hmanga electricity siamchhuah tlakhniam hmasak ber a ni dawn a. A nghawng tur chu energy production laiin warming gases tlem zawk tihchhuah a ni dawn a ni.
A chhan ber nia sawi chu China-in nasa taka renewable energy siamchhuahna lama hma a lak vang tia sawi a ni a. Wind leh solar energy chuan khawvel puma electricity mamawh 12% lai a tharchhuak tawh a ni.
Energy analyst Ember te chuan zirchianna an neihah renewable energy demand chu kuminah a sang tial tial dawn tiin an sawi bawk.
Electricity siamchhuah chu global warming thlentu lian ber a ni a, kum 2021 a energy kaihhnawih carbon emission hmun thuma thena hmun khat lawiha hauh a ni.
Hei vang hian coal, oil leh gas te hman tlem chu khawvelin climate change mihring tana hlauhawm a pumpelh theih nana tihmakmawha ngaih a ni a. Khawvel pum huapin fossil fuel hmanga power production chu a tlahniam viau an ti bawk a.
Khawvel huapin electricity siamchhuah nan solar leh wind te chu nasa zawka hman zel a ni ta a. Nikum khan solar energy chu 24% lawihin a pung a, South Africa anga ram lian te kum khat mamawh pechhuak thei khawp tharchhuah tawh a ni.
Kum 2022 khan nuclear leh hydropower te nen clean energy hmanga electricity tharchhuah chu 39% lawih a tlng a, nikuma electricity tharchhuak te kha la thianghlim ber anga ngaih a ni. Chutihrual chuan carbon emission chu coal thil dang danga hman nasat avangin a la nasa tho thung.
Hei hi a chhan ber chu khawvel huapa electricity mamawhna san zel vang niin chumi phuhruk tur chuan clean energy vek hman a nih loh vang a ni. Hei bakah hian kum 2022 khan nuclear leh hydro electrictiy lamah harsatna awmin Europe a lui tui te hydro generation atana hman ber te chu a tlem em vang a ni bawk.
Kum 2023 hian demand aia sang zawkin wind leh solar energy siamchhuah a nih rin a ni a, chu chu warming gases pekchhuah a titlem hle dawn bawk a. “Electricity siam nana fossil fuel i hmang tlem a nih chuan emission a tlahniam nghal mai dawn a ni” tiin Malgorzata Wiatros-Motyka, report lead author chuan a sawi a.
“Khawvel pumah electrification a sang zel a, electric vehicles kan uar tial tial a, heat pump a pung a, power sector clean zawk chuan sector dang danga emission pekchhuah pawh a tihniam dawn a ni” tiin a sawi.
“Fossil fuel hmang lo leh emission pe chuhak lo energy siamchhuah hunah kan chuangkai tawh a. Wind leh solar energy te hi mamawh chhanna a ni a, a rang thei leh chak thei ang bera tam zawk tharchhuak thei tura roadmap kan siam a ngai a ni,” tiin Dave Jones, Ember, report author pakhat chuan a sawi.
Danglamna nasa ber siamtu chu China niin khawvel huapa wind power 50% vel chu China tharchhuah niin solar energy 40% vel pawh China tharchhuah tho a ni a, chutihrual chuan khawvela coal power hman nasa ber a ni tho bawk.
“Tuna a lan dan chuan China-in wind leh solar energy a kalpui mek zelah coal generation chu kum 2025 aia hma pawhin an hnuchhawn tan thei mai thei,” tiin Jones chuan a sawi a.
Mithiamte chuan power siamchhuahna lama fossil fuel hnawl chu ‘danglamna thlentu tur’ tia sawiin mahse chumi tur chuan tihtur thahnem tak a la awm, an ti bawk a.
“UK-ah coal power generation vanglai kha kum 1979 daih tawh kha a ni” tiin Prof Jessica Jewell, University of Bergen chuan a sawi a. “Mahse, coal power hnawl vek tur chuan a kum sawm tel a la ngai zui a ni. Entir nan kum 2022 khan UK chuan coal tlem azawng a la hmang tho a. Clean energy goal kan thlen nan hian kum 40 emaw 30 emaw kan mamawh tur a ni lo va, hun rei lo thei ang ber chhungin electricity decarbonize hi kan kalpui a ngai a ni,” tiin a sawi.
Fossil fuel hnawl zel clean energy pung
Get real time updates directly on you device, subscribe now.
Prev Post