France captain thar Mbappe
2018 World Cup trophy an lakna kawnga an player pawimawh ber tih ngam, nikum World Cup final thlenpuitu ni bawk Kylian Mbappe kha European Cham-pionship qualifiers-a Netherlands leh Ireland hmachhawn mai tur France captain atan ruat a ni.
Paris St Germain forward hian Hugo Lloris thlakin France captain hna a chelh dawn a, Thawhtannia French sports daily L’Equipe tarlan danin, coach Didier Deschamps nen an inbiak hnuah Mbappe hian captain armband hreng tura tihna hi a pawm fel tawh.
Kumin January thlaa goalkeeper Lloris-a’n international football a chawlhsan hnu khan a zawna World Cup final tum hnih khel thei Mbappe hi Les Blues captain thar ni thei tura candidate langsar a ni nghal a, chu mawhphurhna chu a kutah a tla ta nge nge a ni.
Kum 24 mi hian ram tan game 66 khel tawhin, tlarhma lama France innghahna lian ber a ni mek.
Kylian Mbappe bakah Thuram unau Khephren leh Marcus Thuram-te pawh Euro qalifiers khel tur France squad-ah karliamta Ningani daih tawh khan Deschamps chuan a ko a; Thuram unau bik hi kum 1998 World Cup leh kum 2000 European Championship-a France an champion tuma Deschamps-a team-mate Lilian Thuram-a fate an ni.
Tun hi Deschamps-a’n a squad-a unau a koh vawihnihna niin, nikum Qatar ram tournament khel tur khan Lucas leh Theo Hernandez-te unau koin, khami tum khan forward Marcus Thuram pawh a ko tel a, Thuram naupang zawk, kum 21-a upa midfielder Khephren Thuram erawh Arab ramah a hruai tel lo a, season kal laiah a club vawn lai Nice tana a khelh that em avangin national squad-ah a vawikhatna’n koh a ni ve ta a ni.
France hian naktuk, March ni 24, Zirtawpni zan hian Stade de France-ah Netherlands an mikhual ang a, nithum hnuah Ireland nen Dublin khuaah an insu zui leh ang.
Extra time khelh zawh thlenga 3-3 a nih hnu 2022 World Cup final penalty peta Argentina an ngam loh hnu khan veteran goalkeeper Hugo Lloris leh central defender Raphaël Varane chuan national team chhuahsanin, Deschamps pawhin a squad siksawi hna a kalpui chho tan nghal a; a vawikhatna atan Lens goalkeeper Brice Samba leh Chelsea center-back Wesley Fofana a ko.
Rin lawk ang ngeiin, tuntuma squad thar a dinchhuahah hian mimala intihthiamlohna a neihpui Ballon d’Or dawngtu Karim Benzema a telh lo ta ngei a, hemi chungchang zawhna hi Deschamps chuan a chhang duh lo!
Qatar ramah khan ke hliam avangin Benzema chuan World Cup a chhuahsan a; khami hnu khan newspaper interview-ah Deschamp-a tana hmuh nuam lem lo tur message leh emoji hnutchhiahin, Des-champs-a thu hnialna lam a tichhuak a; tuntuma squad a puan behchhana Benzemna chungchang an zawhah France coach chuan social network a en ngai loh thu sawi chungin Benzema nena an inkar boruak chungchang zawhna a chhang zui duh lo.
-- Advertisement --
France squad
Goalkeepers: Mike Maignan (AC Milan), Alphonse Areola (West Ham United), Brice Samba (Lens)
Defenders: Theo Hernandez (AC Milan), Jules Kounde (Barcelona), Benjamin Pavard (Bayern Munich), Wesley Fofana (Chelsea), Dayot Upamecano (Bayern Munich), Eduardo Camavinga (Real Madrid), William Saliba (Arsenal), Ibrahima Konate (Liverpool)
Midfielders: Adrien Rabiot (Juventus), Aurelien Tchouameni (Real Madrid), Youssouf Fofana (Monaco), Khephren Thuram (Nice), Jordan Veretout (Marseille)
Forwards: Kylian Mbappe (Paris Saint-Germain), Olivier Giroud (AC Milan), Antoine Griezmann (Atletico Madrid), Moussa Diaby (Bayer Leverkusen), Randal Kolo Muani (Eintracht Frankfurt), Kingsley Coman (Bayern Munich), Marcus Thuram (Borussia Monchengladbach)