Real Madrid mamawh pali

Real Madrid mamawh pali
Champions League leh La Liga-a champion mek Real Madrid chu La Liga lamah an boruak a hniam mek. Los Blancos hi an hmelma lian ber Barcelona lakah point 12 zeta an hnufual tawh vangin an tan La Liga-a champion beisei ngam a har tawh. El Clasico-ah Barcelona an ngam loh zawn vangin Super Cup-ah an champion zo lova, Copa del Rey semi-final atangin tla thei dinhmunah an ding mek bawk. An elpui lian an ter pha ta lo viau mai hian Real Madrid hmakhaw ngaitute mang a tiang a. Barcelona el phak tura an tih ngai pali kan tarlang ang.
Carlo Ancelotti ban a ngai
Manager lar leh tawnhriat nghah Carlo Ancelotti hi chhawr tangkaiin, lo hlawhtlinpui thin tawh mahse a hun a liam ve taah ngaih a ni a. An elpui lian ten an tactic hman thin an hre bel viau tawh a, Ancelotti hnuaiah thil thar zir tur an nei tawh chuang lo a ni ber tawh. Khelh dan phung thlak a, hmasawnna thar nei turin Real Madrid hian an manager rawih mek Carlo Ancelotti hi an ban a ngai.
Zidane rawih nawn leh
Real Madrid hian an manager Carlo Ancelotti hi an hun rei an chhawr a rinawm tawh lo. An manager thar tur an dap ru mek a, an manager thar ni tura an sawi rik zingah Chelsea manager hlui Thomas Tuchel, Chelsea enkawl mektu Antonio Conte leh Tottenham manager hlui Mauricio Pochettino te sawi rik an ni. Real Madrid manager ni thei tura sawi rik langsar pathumte ai hian an manager hlui Zinedine Zidane hi ruai nawn leh se Real Madrid hian an thatpui ber a rinawm.
Real Madrid manager hlui Zidane hi club enkawl nei lovin a awm mek a. Didier Deschamps thlakin France manager nih a duh ber a, Deschamps hian contract thar ala ziah deuh deuh vangin Zidane hian club enkawl a neih thuai a rinawm.
Senior player chhuahtir
An squad thuamchak thar a, intuaithar leh turin Real Madrid hian an senior player te an chhuahtir a, rawlthar an lak luh a ngai. An senior player Toni Kroos leh Dani Carvajal te hi la tha viau bawk mah se an tha a thum ve ta viau thung. An senior player Sergio Ramos leh Casemiro te an lo chhuahtir tawh a. Nipui bazar inhawn hunah inthuahthawl leh an mamawh.
An senior player te hmunruak luah turin Borussia Dortmund leh England midfielder Jude Bellingham chu an player mamawh a ni a. Bellingham hi an la thei a nih chuan hma an sawnpui dawrh thei tura ngaih a ni. Bellingham lak bakah hian senior player Luka Modric aiin Eduardo Camavinga khelh tam tir a tul tawh bawk.
Benzema thlachhangdawltu tha
Khawvela football clun hausa leh hlawhtling ber ni bawk mahse an forward pawimawh Karim Benzema thlachhangdawltu an nei tha tlat lo thung. Ballon d’Or kawl mektu Benzema hi hliamin a tibuai tam ta viau a, hliam tenau nei chung pawhin Real Madrid hian an mamawhna a san em vangin Benzema hi an chhawr lo thei thin lo. Benzema a awm loh chuan an tlarhma a bil tlat thin a. Benzema thlachhang dawltu tur tha tak lak luh an mamawh.