France in Netherlands an sawp

March 24, Zirtawp zan khan Euro 2024 khel tur zawnna khelh chhunzawm a ni a. France chuan khingpui hautak Netherlands chu sili faiin an sawp a, bul an tan tha hle. Zirtawp zana inkhel dangah Belgium chuan si thum faiin Sweden an sawp a. Inrinni zan khan Spain chuan awlsam takin Norway an hneh ve bawk.
France in Netherlands an sawp
World Cup 2022-ah uiawm taka champion zo ta lo France hian Stade de France-ah football thiam ram Netherlands an mikhual a. Netherlands nen hian inhnehtawk viau tura ngaih ni mah se France an chungnung ta viau thung a. Captain thar Kylian Mbappe chuan goal hnih a thun a, hneh takin an team a ho khawm.
France hian an mualah duhthusama thain bul an tan a, inkhel tan atanga minute hnihna lekah vice captain Antoine Griezmann chuan Mbappe siamsak atangin hmahruaina goal a thun nghal. Hma takah goal an thun hian inkhel boruak a her danglam dawrh a, Mimualah Dutch an che hleithei tawh lo.
Goal hmahruai an thun atanga minute nga hnu lekah France hian goal an thun belh zui leh nghal. Minute sarihnaah Grizmann free-kick chhuih tha tak chu Dayot Upamecano chuan awlsam ang reng takin a pet goal a, minute 8-naah an goal hnihna a thun.
Minute riat chhung leka goal hnih thun hman France hian an mikhualte an nawr chhunzawm zel a, minute 21-naah Tchouaméni ball pek fing tak chu chak taka a awm tlang hnuin captain thar Kylian Mbappe chuan tha zetin a pet goal a an goal thumna a thun. France hian goal thun belh theihna hun tha nei bawk mahse goal dang an thun belh thei lova, si thum faia hmahruai chungin chawlhlawk an hmang.
Chawlhlawk hnu lamah France an khel tha chhunzawm zel a, hun tawp dawn hnaih minute 88-naah mangang zeta Netherlands tlarhnung a siam hnuin Mbappe chuan chiang zetin a pet goal a, an goal lina a thun. Natherlands hian an si phurh sut tumin tan khawh zui viau mah se hun tawp thlengin goal an thun thei lova, France lakah si li fai ngawtin an tlawm zui ta a ni.
Netherlands sawptu France hian Group B-a team awm panga zingah hma an hruai nghal a, si thum faia Gibraltar sawptu Greece chu pahnihnaah an awm a, Netherlands hian table hnuai ber an luah rih thung.
Belgium tan Lukuka a inlar
Zirtawp zana Euro 2024 khel tur zawnna dangah Belgium chuan Friends Arena, Stockholm-ah Sweden an luhkhung a, Romelu Lukaku hattrick hmangin hnehna nuamsa an chang.
World Cup 2022 ah beisei a phak loh vanga sawiselna nasa tak tuar Lukaku hian minute 35-naah Lukebakio ball vawrh luh a tauh goal a, hmahruaina goal a thun. Chawlhlawk hmain goal thun belh thei lo mah se second half-ah Belgium in goal an thun belh leh thuai a. An goal hnihna thuntu chu Lukaku bawk a ni. Lukaku hian hnaite atangin a pet goal a, an goal hnihna a thun. Captain thar Kevin de Bruyne kaihhruaina hnuaiah Belgium an khel tha chhunzawam zel a, hun tawp dawn hnaih minute 82-naah Lukaku chuan goal thun belhin hattrick a siam a, Belgium hian si thum faiin hnehna an chang zui ta a ni.
Si thum faia Sweden sawptu Belgium hi Group F-ah pahnihnaah an awm a. Zirtawp zanah 4-1 a Azerbaijan hnehtu Austria chu Group F hmahruaitu an ni.
Belgium an hmachhawn tum hian forward lar Zlatan Ibrahimovic chu Sweden tan a inlan a. Kum 41 leh thla nga leh ni 21 a upa Ibrahimovic hian kum 1983 a Italian goalkeeper Dino Zoff record siam a khum a, European Championship qualifier-a khel thei upa ber record thar a siam. Record thar a siam zanah Ibrahimovic hian lawm hlawh viau mahse hattrick siamtu Lukaku boruak in a luahlan ta tlat thung
Spain in bul an tan tha
Inrinni zan khan Euro 2024 khel tur zawnna neih chhunzawm niin football thiam ram Spain chuan tha takin bul an tan a, La Rosaleda-a an mikhual Norway chu si thum faia sawpin Group A hmahruaitu an ni nghal. Group A a inkhel dangah Scotland chuan Hampden Park-a an mikhual si thum faiin Cyprus an sawp ve bawk.
Spain hian Manchester City goal thun khawl Erling Haaland tel lova inlan Norway lakah bul an tan tha viau a, minute 13-na lekah Dani Olmo chuan Balde siamsak atangin hmahruaina goal a thun. Hma takah goal thun mahse goal dang thun belh turin hun tawp lam an nghah thlen a ngai thung. Minute J83-naah Joselu chuan an goal hnihna a thun a. Spain tan a khelh hmasak bera goal thun nghal Joselu hian minute 85-naah an goal thumna a thun zui leh zat bawk. Espanyol forward Joselu hian kum 32 mi zet a ni tawh tiha Spain tan a khel ve tan chiah a, ram tan a khelh hmasak berah goal hnih thuin a chetha nghal viau thung.
Inrinni zana inkhel dangah Scotland chuan Hampden Park-ah Cyprus an mikhual a. Scott McTominay goal hnih leh John McGinn goal thun hmangin an mikhualte hi si thum faiin an lo sawp a, tha takin bul an tan.
Scotland hian an mualah bul an tan tha a, goal thun ngei tumin an mikhualte an nawr bet nghal. Minute 21-na lekah John McGinn chuan hmahruaina goal a thun nghal. Hma takah hmahruaina goal thun bawk mahse goal dang thun belh turin an nghak rei viau thung. Minute 87-ah Scott McTominay chuan an goal hnihna a thun a, ani hian minute 90+3-ah goal a thuma a thun zui leh bawk.