France leh England an chak

Inrinni zana Euro 2024 khel tur zawnna football ram ropui pahnih France leh England ten awlsam takin hnehna an chang a, point thum an hmu.
Group B-a hmahruai mektu France hian an group-ah a hnuai bera awm mek Gibraltar chu Portugal-a Estádio Algarve khelmualah an hmachhawn a, si thum faiin hnehna an chang.
France hian Gibraltar lakah bul an tan tha viau a, inkhel tan atanga minute thumnah lekah France tana goal thun hnem ber Olivier Giroud chuan hmahruaina goal a thun nghal. Hma takah goal an thun vangin France an khel tha chhunzawm viau a, an khingpuite an nawr buai thei hle. France hian chawlhlawk hmain goal an thun belh leh a, minute 45+3-ah Kylian Mbappé chuan penalty atangin an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah France an khel tha chhunzawm a, minute 78-naah Gibraltar player Aymen Mouelhi chuan an lamah a ti-goal palh a, France goal thumna a thun belh. Hun tawp thlengin goal dang a luh belh tawh lova, France chuan si thum faia hnehna changin, hmahruaitu an nihna an sawh nghet.
France hian Euro 2024 khel tur zawnnaah vawi thum khel tawhin an la chak vek a, point kua hmuin Group B-ah hma an hruai a. An elpui lian tura ngaih Netherlands chuan khelh hnih atangin point thum chauh an la hmu a, pathumnaah an la awm rih.
Inrinni zana inkhel dangah Euro 2020 finalist England chuan Group C-ah table mawngphaha awm mek Malta an hmachhawn a, si li faiin hnehna an chang. England hian point kua hmuin hma an hruai chhunzawm zel.
England hian an len luhna Ta’ Qali National Stadium-ah bul an tan tha viau a, inkhel tan atanga minute thumna lekah Ferdinando Apap own-goal hmangin hma an hruai nghal. Hma takah goal an thun hnuin Trent Alexander-Arnold chuan minute 28-naah an goal hnihna a thun. Liverpool defender Arnold hi England manager Gareth Southgate chuan a pawt hma hret a. A position tharah tha taka khelin goal khat a thun bakah assist vawi khat a nei nghe nghe a, ti taka chetha hi Southgate lawmna tizualtu a ni ngei ang. Goal hnihna hma an hruai hnuin England takna goal thun hnem ber Harry Kane chuan minute 31-naah penalty atangin an goal thumna a thun zui leh a, si thum faia hmahruai chungin chawlhlawk an hmang.
Chawlhlawk hnu lamah England an khel tha chhunzawm a, minute 83-naah Callum Wilson chuan an goal lina a thun a, goal dang luh belh lovin inkhel a tawp zui ta a ni. Group C-ah England hian vawi thum khelin an la chak vek a, hma an hruai zui zel. Group C-ah hian Unkraine, Italy leh North Macedonia ten khelh hnih atangin point thum theuh an hmu mek a, Malta in point an la hmu ve lo thung. Euro 2024 khel phak turin an inel na zui hle tura ngaih a ni.