French Alps hmun hniha vur tawlhah panga thi
Tual chhung thuneitute chuan French Alps hmun hniha vur tawlh avangin vur tleng mi panga an thi tih an sawi.
Savoie region chhimchhak, Val-Cenis-a vur tawlh nasa takah Norwegian vur tleng mi pali an thi a. Haute-Savoie region hmar lam, Chamonix bula tawlha Swiss vur tleng mi pakhat a thi bawk.
Norwegian pathum hi a hmunah an thi nghal a, pakhat, hmeichhia chu a bul damdawi ina lak a nih hnuah hypothermia leh cardiorespiratory arrest vangin a thi.
Heng mite hi an vaiin pasarih an ni a, a huhova an tleng chu vur tawlh hian a hnawl a, mi dang pathum chu an him a ni.
Val-Cenis Mayor Jacques Arnoux chuan an zavai hian vurin a khuh vek pawha an awmna hriattir thei khawl, avalanche beacon an tih chu an keng vek a, hei vang hian hmuh an harsa lo hlauh niin a sawi.
An tlengna hmun chu backcountry skiing an tih, vur tlengna tura chhinchhiah ni lo, vur tleng mite tana hman theih loh tih pawh an hria a, heng hmun hi a hlauhawm zual lai a ni.
“Vur tlengna hmun pawn lamah lian takin vur hi a tawlh ta a ni,” tiin Mayor Arnoux chuan a sawi.
Police chuan chhanchhuah hna thawk tur hian tlanga mi chhanchhuahnaa thiamna nei bik mi 10 tirh chhuah an ni tih an sawi.
Swiss thi hi hmeichhia kum 30 mi a ni a, a nutapa nena tleng an ni a. Damdawi inah hruai a ni a, an chhan thei ta lo va. An tlengpui tho, a pa chu na lovin a chhuak.
Na ve lo pathum hian anti-avalanche airbag an keng theuh va, hei hi an him chhan pawh nia hriat a ni.
Thawhlehni khan Mont Blac-a vur nasa taka tawlhah Brazilian-Portuguese vur tleng kum 55 mi chu a lo thi tawh bawk.
French Alps hmun hniha vur tawlhah panga thi
Get real time updates directly on you device, subscribe now.
Next Post