French Open-ah Nadal inlan thei dawn em?

French Open-ah Nadal inlan thei dawn em?
French Open match 115 a khelh tawha match 112 tehreng chak tling Rafael Nadal chu khel bawr hliamin a la tibuai chhunzawm zel a, karlehah khelh tan tur Monte Carlo Masters atanga a inhnuhdawh hnuah champion lai a nihna French Open-ah kumin hian a inlan thei dawn em tih a la chiang lo!
Spanish world number 14 hi Monaco tournament-ah hian tum 11 zet champion tawhin, kuminah pawh tel thei se rinkai a ni zui leh nghal dawn a, mahse, a fitness a la chiang thei tlat lo a, kumin Australian Open second-round lama American Mackenzie McDonald a hneh loh hnu khan tun thlengin competitive match a la khel leh ta lo.
Melbourne khuaa a chak loh hnu khan Nadal hi MRI khawl hmanga endik niin, a lo berah pawh thla ruk atanga thla riat lai a chawlh rih a ngaih tur thu hrilh a ni.
European clay-court season bul a tan theih dawn tak loh avangin a nghawng lenna kumkhua Roland Garros lamah hian record siama title 14 a lak tawh kha kumin hian a belhchhah thei dawn em a chiang ta lo ruai a ni.
Kumin Paris khaw grand slam tournament hi May ni 28 atanga khelh tan tur a ni.
Nadal chuan tun dinhmunah level sang bera inelna hmachhawn turin a la inpeihchhuak lo tih Twitter kaltlangin Thawhlehni khan a sawichhuak a, a career-a tournament pawimawh berte zinga pakhat Monte Carlo lamah pawh a inlan theih loh tur thu sawichiang nghalin, a kirleh theih thuai a beisei thu bak chiang takin a kirleh hun tur a la sawi thei lo.
Kum 36 mi Nadal bakah a chipui leh world number two ni bawk Carlos Alcaraz pawh hliam avang bawkin Monte Carlo atang hian a inhnukdawk fel ve tawh bawk.
Novak Djokovic nena number one ranking inchhuhtawn zak zak mek Spaniard Alcaraz hian a hnungzang a tina a, Miami Open khelh zawh tak mipa singles semi-final match pakhat zawka Jannik Sinner a hneh loh hnu khan Twitter lamah a dinhmun tarchhuakin:
“Thla hnih lai tuipui ral lama ka thangbo hnuah hlim takin kan khua ka lut a, mahse, ka match khelh hnuhnung ber erawh taksa nuam lo tak chungin ka khel zo thei hram a ni,” tiin na nei chunga Sinner a hmachhawn thu a sawi a, Monte Carlo lama clay-court tour bultanna pawh a chhim theih loh tur thu a tarlang tel.
Rawlthar kum 19 mi lek ni chunga world number one ni thei Alcaraz hian a kut veilam ruh nuam lo leh a hnungzang tihrawl nuam lo avanga chawlh rih det a mamawh thu a sawilang tel bawk.
Canada world number seven Felix Auger-Aliassime pawh a khup veilam hliam avangin karleha khelh tan tur Monte Carlo Masters-ah hian a tel thei dawn lo a, April ni 26-a tan tur Madrid Open-ah erawh tel hman a inbeisei thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More