German Cup atangin Bayern tla fel

German Cup atangin Bayern tla fel
Thawhlehni zan German DFB Cup-ah SC Freiburg chuan 2-1-in mualneitu Bayern Munich an hneh a, German Cup atangin Thomas Tuchel-a team an tla fel a, a zawna he tournament last four an luh zawh loh kum thumna lai a ni ta!
An record kawl lai belhchhaha Bundesliga title 11 lak zawn tlin an tumna kawnga hlawh-tling hnai leh kuar tawh Bavarians hi German Cup quarter-final khelin an chechhuak a, goal pawh an khung hmasa ngei a, mahse, Freiburg lamin an siphurh an sut thuai a, hun pekbelh minute 95-a penalty an hmuh atangin Lucas Hoeler chuan mikhual team chakna goal a chhuihlut zui ta a ni.
Bayern Munich tana hmahruaina goal hi first half minute 19-naa Day-ot Upamecano tauhluh niin, minute riat an khel leh tihah Nicolas Hoefler chuan SC Freiburg sipurh sutna goal a khung ve leh a, 1-1-in chawlhlawk an hmang.
Second half-ah goal a lut mai thei ta lo a, in-hnehtawkin hun pang-ngai an hmangzo thei takngial dawna a lan hnuah Jamal Musiala chu box chhung-ah a handball a, Freiburg lamin semi-final an luh phah ta a ni.
Tun kha Thomas Tuchel hoa Munich-in game hnih an khelhna chiah niin, karliamta Inrinni khan Allianz Arena team a enkawl hnua a match hmasa-berah Borussia Dort-mund chu Bundesliga lamah 4-2-in an hneh a, Thawhlehniah an tlawm zui leh nghal.
Bundesliga table-a Dortmund hnuaia an chhuk hnuah Munich club-in an boss chhawr lai Julian Nagelsmann banin kum 2015 – 2017 chhunga an lo chhawr tawh Tuchel an senglut a, German Cup lamah a tlakpui ta phawt a ni!
Thawhlehni inkhelah Tuchel-a team hian inkhel hun tam zawk thunun mah se rinkai lo zawk Freiburg an chak a; chutih laiin Freiburg hi nikum German Cup final pawh lo khel ve tawh niin, penalty petah RB Leipzig an ngam ta lo kha a ni a, Bayern erawh a zawnin kum thum ngawt German DFB Cup last four lut zo lo zawngin an khawsa!
Quarter-final inkhel dangah Randal Kolo Muani chuan goal hnih khungin Union Berlin lakah sihnih faiin Eintracht Frankfurt an chak a, cup semi-final an lut ve bawk.