French police leh lungawilote inbakkaih

Paris-a police-te chu French sorkarin parliament-a vote paltlang lova pension reform a pawm avanga lungawi lovin an inbakkaih a.
Mipuite chu Place de la Concorde-ah French sorkarin retriement age kum 62 atanga 64-ah a tihsan duh lovin an pungkhawm a ni.
Pension kum tihsan hi France ramah chuan inhnialna nasa tak chawk chhuaktu niin, a tawpah Prime Minister Elisabeth Borne chuan article 49:3 of the constitution lekkawhin Assembly-a vote hmanga pawm kher kalkanin sorkar chu thutlukna a siamtir a ni.
Thutlukna siam hi MP rual tena vote laa thutlukna an siam hma lawka kalpui niin vote la se chuan a chak zawk tur hriat miah loh tia sawi niin chumi kal kan nan chuan sorkar in hma a la ta a ni.
Sorkar chetlakna chuan opposition politician te a thinur hle a. Tam tak te chu prime minister chu au elin, La Marseillaise an sak khum a parliament-ah an lungawilohna an lantir bawk.
President Emmanuel Macron sorkar lakah no-confidence motion kalpui nghal tur a ni tiin far-right opposition leader Marine Le Pen chuan a sawi.
Leader of left-wing party La France Insoumise (LFI), Mathilde Panot chuan Macron chuan an ram chu parliament emaw popular legitimacy pawh tel si lovin buainaah a hnuk lut tiin a sawi.
Sorkar hmalakna duh lo hian Paris leh French khawpui dang dangah te kawtthlerah punkhawm niin national anthem te sain trade union flag te vai a ni bawk a.
Lungawilohna lantirtu thenkhatte chu police te nen intibuai bawkin Place de la Concorde laili laiah meichhem niin police te chuan heng mite hi tear gas leh tiang hmangin an um darh thung a. Zing khawvar dawn meuh chuan mi 120 man an ni tawh tiin Paris police te chuan an sawi.
Trade unions te chuan lungawilohna lanpui chhunzawm an tum thu sawiin Confederation Generale du Travail (CGT) te chuan 23 March Thursday-ah liantham taka lungawilohna lantir an tum thu an sawi.
Macron hi nikum khan retirement reforms siam intiama thlan tlin a ni a, mahse, a ruling coalition chuan Assembly-ah majority an nei lo va, hei vang hian loh theih lohin Republicans party te thlawpna mamawh ngei ngei a ni.
Macron-a Renaissance party te chuan theihtawp chhuaha bill chu pass a nih theihnan hma an la a, mahse, MP thenkhatte te chuan an duh dawn lo tih an hriat chian hnuah special constitutional powers an hmang zui ta mai a ni.