French tumhmun bul kang thelhnaah mi pahnih thi

France chhimthlang, Bordeaux-a thlawhna tumhmun bula kang thelhnaah kang thelhtu pahnih an thi tih thuneituten an sawi.
French chanchinbute chuan tumhmuna lirthei hunna bul maia kang hi a bul ram kang atanga kai niin in a kang kai a ni tih an tar lang.
Thlawhna atanga chhukten social media-a thlalak an dah chhuahah chuan meikhu dum tak van lama a chho a lang a. Bordeaux–Mérignac tumhmuna tum tur thlawhna tam tak tihkhawtlai a ni.
A bika duan thlawhna nan kang thelhtu 100 velin tihmih tumin an buaipui.
Interior Minister Laurent Nuñez-a chuan Gironde department-a thuneituten thi an awm thu an hrilh tih a sawi a. Thawhlehnia French parliament-a zawhna leh chhanna hunah kang thelh hna thawh enpui turin ‘a hma thei ang berah’ Gironde hi a pan dawn tih a sawi.
Khaw lum uchuak leh rei takin tun hnaia ram kang a siamin a tihbuai French department tam tak zingah Gironde pawh hi a tel.
Thawhlehni vek khan chhimchhaka Var department-ah kangmei a chhuak a. Pontevès-a kang hi ‘tun dinhmunah chuan thunun loh leh inman kai chak tak’ niin France puma kang thlithlaitu, PSFDF volunteer association chuan an sawi.
Kang thelhtu leh chhan chhuaktu 500 chuang tirh niin mi 150 vel hmun himah suan an ni tawh.
France-ah hian kuminah kangmei 11,000 dawn a chhuak tawh a, President Emmanuel Macron-a chuan kar hmasa khan Indopui II-na hnuah hetianga kangmei chhuak nasa hi an la tawng lo niin a sawi.
European Forest Fire Information System (Effis) thlalem atanga a lan danin France-ah hian January leh July thla laihawk thlengin ram hectare 42,000 chuang a kang tawh a, kum 2022-a kang zat a khum.
Sik leh sa inthlakin khawvel pum a tilum chak a, Europe chu lum chak ber khawmualpui niin khawvel pum lum chak dan let hnihin a lum chak zawk niin Copernicus Climate Change Service chuan a sawi.
Hei hian nipui lum lutuk, Europe-a tui indaih lohna leh ram kang a siam nasa.
Tun nipuia Europe khaw lum hian ramngaw kang a tichhuak nasa a, Spain-ah pawh mi 13 vel thi an awm tawh.
Spanish khawpui hmar lama ramngaw kang nasa takah hectare 29,000 vel a kang chhe tawh a ni.