US-in Iran kap zel, lei hnuai nuclear hmun kahah a vau bawk

US-in Iran kap zel, lei hnuai
nuclear hmun kahah a vau bawk
US chuan a zawna zan 11 nan Iran a kap leh a, Tehran chu an nuclear hmunte beihah a vau bawk.
US Central Command (Centcom) chuan ‘Iran-in Strait of Hormuz-a sumdawng lawngte an tihthaih theihna tihnep nan’ an kap leh tih a sawi.
Iranian sorkar chanchinbu pawhin an khawpui, Tehran-ah air defence tihnun a ni tih a sawi a. Tabriz, Chabahar, Konarak, leh an nuclear plant awmna, Bushehr-ah thil puak a awm.
Iran hian Donald Trump-a’n lei hnuai nuclear hmunhma, Natanz bula mi an kap hnai tih a sawi hnuah US leh Middle East-a an thawhpui ramte kapin an chhang let ve bawk.
Iran leh US hian April khan inkahhai an puang a; mahse, kar hmasa atang khan Strait of Hormuz tuikawng inchuhin an inbei thar leh.
Centcom chuan US sipaite hian Iranian sipai hmun, tuipui an thlithlaina leh venna, thlawhna dahna, drone an chhekna leh sipai thil hrang hrang an kah thu an sawi.
Thla thum liam ta chhung khan Strait of Hormuz-a ‘sumdawng lawng 30 chuang’ beihah Iran hi an puh bawk.
“Tul lo taka beihna hian pawisawi lo tuipuia hna thawkte nunna a tiderthawng a, zalen taka an kal theihna a tichiang lo bawk,” an ti a. Tuikawng chu ‘sumdawng lawngte tan hawn reng a ni’ tih an sawi.
Kuwait-a sipaite chuan Nilaini tuk khan an air defence chuan Iran atanga drone thlawkte an lo dang tih an sawi a, Bahrain leh Jordan pawhin drone leh missile an kap thla tih an sawi ve bawk.
A hmain US president chuan an sipaite bitum leh tur chu Pickaxe Mountain tia hriat, lei hnuaia nuclear hmun, Iran-in a puan lem lohva uranium a tihchakna hmun a ni tih a sawi.
“He hmun hi kan bei tep tawh a, na takin a ni dawn,” tiin Trump-a chuan White House-a Lebanese President Joseph Aoun-a nen an inkawmnaah a sawi nia tar lan a ni.
Iran-a Khatam Al-Anbiya military command chuan he hmun beih hian ‘an chhehvela indo a tizau dawn’ tih sawiin beih a nih chuan ‘America, an thawhpui leh thlawptute tan thil hlauhawm’ a thlen dawn tih a sawi niin sorkar broadcaster IRIB-in a tar lang.
Trump-a hian Yemen-a Iran-in a thlawp hel pawl, Houthi pawh Saudi lawng chawlhna dan an tum an kalpui tlang chuan ‘kan hma zel ang’ tih a sawi.
Houthi chanchinbu chuan Red Sea chhim lam chhuahka, Saudi panna, Bab al-Mandab Strait chu khar an tum tih a lo tar lang bawk.
Red Sea hi US leh Israel tang dunin Iran an beih avanga Strait of Hormuz khar a nih mek lai hian Saudi Arabia atanga tuialhthei phurh chhuahna kawng pawimawh a ni.
Houthi thupuan hnuah hian China leh India pan tur Saudi tuialhthei thlitfim loh phur lawng pahnih chu Saudi Arabia-a Red Sea lawng chawlhhmun, Yanbu atangin kirtir an ni a, Suez Canal an pan ta zawk niin British maritime risk management group Vanguard chuan a sawi.
Houthi-te vauna avang hian khawvela bungraw phurhna a buai lehzual rin a ni a, heng lai vela indona hian khawvel puma tuialhthei man a tisang mek a ni.
Iran leh US hian June thla khan inbei tawh lo tur leh Strait of Hormuz hawnna tur inremna, Memorandum of Understanding (MoU) an ziak a, ni 60 chhunga indawr zui an tum bawk.
Chawlhkar thum hnua Iranian-ten Hormuz-a lawng an beih an chhan let hnuah Trump-a chuan inkahhai ‘a tawp’ tih a puang zui.
Iran nena an indonaah US hian $ tluklehdingawn 37.5 a seng tawh a, May thlaa an chhut hnuhnung ber aiin $ tluklehdingawn 8 dawnin a tam tawh tih Defense Secretary Pete Hegseth-a’n Thawhlehni khan a sawi.