Fulham-ah Broja

Chelsea striker Armando Broja chuan tun season la bang zawng loan-a khel turin London club ve bawk Fulham a pan.
Kum 22 mi Broja hian season kal lai inelna hrang hrangah Blues tan game 19 khel tlingin goal hnih a thun a, winter trans-fer window hawn laiin Wolves leh AC Milan-in ngaihven mah se Chelsea chuan la hruaikirleh theih turin Graven Cottage lamah inchherhriam turin an chhuahtir ta zawk a ni.
Albania international hian December 2022 khan a khupah hliam serious tak tuarin, 2022-23 season chanve zet kha a bawksawp a, Chelsea chuan an academy graduate hi club danga chhuahtir mai loin ropui zawka a kirleh theih hun nghak turin Fulham an hawhtir ta niin a lang.
Hetih lai hian Chelsea mid-fielder Andrey Santos pawhin loan bawkin French Ligue 1 club Strasbourg a zawm a; tun season tir lam khan he rawlthar kum 19 mi hi loan-in Nottingham Forest-ah an chhuahtir a, January thla Chelsea chuan an hruaihaw a, France rama an thawnbo leh hma khan game hnih a khel hman.
Crystal Palace pawhin Adam Wharton chu Blackburn Rovers atangin £18m-in an lei.
Midfielder Wharton hian kum ruk mi lek a nih lai atangin Rovers a zawm a, tunah kum 19 mi ni tawhin, a man hi £22m thlenga la sang chho leh turin inremna an ziak.
Tun season kal laiah England Under-20s player Wharton hian Rovers tan match 26 khelin goal hnih a khung tling.
Nottingham Forest chuan Borussia Dortmund midfielder Giovanni Reyna chu loan-in an senglut a, tun season thlengin England-ah a khawsa phawt ang.
Reyna hian kumin chhung bikah Dortmund tan game 11 khel tling tawhin, chu’ng zinga vawi 10 chu substitute bench atangin a lut a; tunah kum 21 mi a ni mek.