Fur atan Champhai inpuahchah Chhiatna thlen dan thlirlet

Fur atan Champhai inpuahchah
Chhiatna thlen dan thlirlet
District Disaster Management Authority (DDMA) Champhai chu Thawhlehni khan an chairman, district bawrhsap James Lalrinchhana hoin an thukhawm.
Bawrhsap chuan furpui thleng tur laka inpuahchah lawk a pawimawh thu leh, chhiatrupna chu thleng thei reng a nih avangin hetiang hun a thlena chiai mai loa chetlak dan inzirtir zau a pawimawh tih a sawi a. Rikrum thlen thulhah mawhphurhna theuh, tih tur leh tih loh tur hriat bel a pawimawh tih a sawi.
Kum 2022- 2023 chhunga hmalakna thlirho a ni a. Kumin August 1, 6-8 chhunga Mizoram puma lirnghing thleng tura inruahman leh chet lak dan chan chhin tumna, State Level Mock Exercise on Earthquake Disaster kalpui dan tur, fur hmachhawn kawnga inpuahchah dan turte sawi ho a ni.
DDMA Champhai Annual Report 2022- 2023 a tarlan danin, chenna in 10 a kang a; heng zinga 6 hi a kangral vek niin, a then azar kang 2 a awm a, 2 dang chu dan loa petrol/ diesel kawl avanga kangmei chhuak niin, an ni bik hi dan tlawhchhanin chhawmdawlna pek an ni lo.
Lirnghing vangin chenna in 1 leh school 1 a chhia a. Ruahsur nasa avanga tuilianin sangha dil 1, agriculture farm 223 a tichhia a, leimin vangin chenna in 20 a chhe bawk. Leiminin kawng a hnawhpin tum 11 thenfai niin, protection wall 1 siam a ni a. Thlipui tleh avangin chenna in 28 leh agriculture farm chhia 22 report a awm. Kangmei chhuakin horticulture farm 10 a tichhia a. Rial tla in chenna in 1 a tihchhiat bakah ruah bawhawkin agriculture farm 20 a tichhia a ni. Chhiatna thleng tuartute hnenah hian dan tlawhchhanin chhawmdawlna pek a ni.
Dedicated Covid Health Centre (DCHC), Covid Care Centre (CCC) leh Champhai Fire Station-te hnenah hmanrua pek a ni a. Awareness campaign vawi 17 neih a ni bawk.
Quick Response Team training pek te, leimin, tuilian leh thlipui vanga chhiatrupna thlen hluar zualna hmunte zirchian nise, a tul anga hmalak dan tur duan nise tih a ni.