Fur laia immunity tichak thei thei

Fur lai hian natna chi hrang hrang a leng duh hle. Boruak a hnawng a, chu chu virus, fungi leh bacteria tan inthlahpunna tha tak a ni a, thosi tan inthlahpunna tur tui tling a lo tam bawk a, thosi atanga natna kai theih malaria, dengue te pawh a tam hun a ni a, chutiangin tui atanga natna kai thei, thypoid leh cholera te pawh a tam lai a ni thin. Fur lai chuan kawngsir eitur an zawrh te ei mai mai loh tur tih an sawi kan hre fo tawh ang, hetiang hunah hian khawlaia eitur an zawrh te atangin natna chi hrang hrang kai a awlsam lehzual a ni. Tun tumah hian Times of Infia health section-in fur laia kan taksain natna a do chak theih nana thei ei tur tha ni a an sawi te kan rawn tarlang e.
Fur lai chuan thei leh thlai ei tam lehzual tur a ni a, thei thur lam chi ei tam tur a ni. Fur-ah hian kan digestive system a chak lo duh riau a, chuvangin chaw paitawih awlsam chi ei tam zawk tur a ni a, thil kan ro (deep fried) lam chi te ei tam loh a tha. Thei thur lam chi hian Vitamin C an pai hnem a, chu chu taksain natna a do let theihna tichaktu tha tak an ni. Heng thei thur (citrus fruits) te hi an nih phungah acidic ni mah se, kan ei hnuah, kan kawchhungah hian alkaline-ah an insiam ve leh thung a, chu chu taksa tana tha tak, natna hrik chi hrang hrang ten an huat a ni.
Fur laia taksain natna a dona tihchak nana thei eitur tha te chu:
1. Plum: Plum hian vitamin C leh K, potassium leh dietary fibre a pai hnem a, taksain natna a do theihna tichaktu leh hritlang leh infection dang laka min veng theitu tha tak a ni.
2. Cherry: Chery chu tute pawhin tui kan ti vek mai awm e, antioxidant a pai hnem hle a, taksain natna a do theihna tichaktu a ni a, BP a siamtha a, cholesterol tha lo a tihniam thei bawk.
3. Lychee: Fur laia thei ei atana tha tak a ni, Vitamin C leh antioxidant a pai hnem hle a, infection laka taksa veng theitu tha tak a ni.
4. Peach: Vitamin C a pai hnem hle a, fibre a pai hnem hle bawk, chuvangin taksain natna a do theihna tichaktu tha tak a ni a, calorie a pai mang lo a, chuvangin inticher duh te tan a tha hle bawk.
5. Theibuhfai (pomegranate): Taksain natna a do theihna tihchak nana nutrient pawimawh zawng zawng a nei vek emaw tih tur khawpa thei hrisel a ni a, chuvangin fur laia thei ei atana duhthusam a ni.
6. Fanghma: Min tihnawng tu tha tak a ni a, kawchhunga thil tha lo awm te paihchhuahna tha tak a ni a, natna do theihna tichaktu a ni bawk.
7. Pear: Vitamin C a pai hnem bakah nutrient leh fiber a pai hnem hle a, taksain natna a do theihna tichaktu a ni a, calorie a pai mang lo a, chuvangin intihcher tumte tan a tha bawk.
Heng kan tarlan bakah hian theihai, blahla, tomato, dawnfawh te pawhin antioxidant an pai tam a, taksain natna a do theihna tihchakna tha tak an ni. Vitamin C pai tam thei leh thlai ei tam la, tui in tam bawk ang che.