FWA player of the year Salah

England tualchhunga Football Writers Association (FWA) chuan Liverpool forward Mohamed Salah chu mipa player tha berah an thlang.
Mohamed Salah hian EPL season kal mekah Liverpool tan goal 28 a thun a, assist vawi 18 lai a nei tling tawh bawk. EPL-a game 38 khelh a nih chinah season khata goal contribution ngah ber niin record thar duhawm tak a siam. EPL-ah hian khelh hmabak game li ngawt nei chungin Liverpool a champion pui nghe nghe. Salah hian a ropuina Liverpool ah kum 2027 thleng cham turin contract thar a ziak fel tawh a, Anfield timawitu a ni zui zel dawn.
FWA player of the year award dawng turin Salah hian vote tla zawng zawng atangin 90% zet a hmu phak. Vote nei mi 900 atanga hetiang zat vote a hmu hi he chawimawina dawng tura vote hmu sang ber a ni a, pahnihna nen an inkar hlat ber tum a ni. Salah hian FWA player tha ber chawimawina hi vawi thum a dawnna a ni a, Thiery Henry nen chiah FWA chawimawina sang vawi thum dawng thei awmchhun an ni. Salah hnuai chiahah hian Liverpool centre-back Virgil van Dijk a awm a. Pathumnaah Newcastle striker Alexander Isak a awm laiin Arsenal midfielder Declan Rice chu palina a ni ve thung.
Salah-an mipa lama chawimawina sang a dawn laiin Arsenal leh England striker Alessia Russo chuan hmeichhe lama chawimawina sang a dawng ve thung. Russo hian Women’s Super League season kal mekah goal 12 a thun a, champions league lamah goal riat lai a thun tling tawh bawk. Hmeichhe lama Arsenal player zingah he chawimawina dawng thei pahnihna a ni a, he chawimawina dawng tur hian season liam taa chawimawina dawngtu Khadija Shaw a khum.