G20 president nihna India-in a chhawr dan PUC-ah zirho

India-in G20 president nihna a chelh chhunga ruahmanna a siam dan leh a chhawr tangkai dante bihchianna leh zir hona chu Pachhunga University College Political Science Department buatsaihin Ningani atang khan neih tan a ni a, vawiin – Zirtawpni ah chhunzawm a ni ang.
He national seminar hawnna hmanpuitu Information & Public Relations minister Lalruatkima chuan India ramin G20 President nihna a chelh chhunga hmalakna tur ruahmanna fel tak siamin khawvel ram economy rualkhai zawka a kal theih nan, ramdangte nen insumdawn tawn dan mumal zawk leh intluktlang zawka a kal theih nan, tunlai thiamna digital leh technology hmanga economy chawisan kawngah, economy tlakchhiatna laka invenna regulatory framework tihchangtlun, ram thenawmte nena thawhhona tha zawk neih, retheihna umbo, hriselna kawnga tan lak, sik leh sa danglam zelah kan chenna khawvel boruak tihthianghlim kawnga tan lak chu a ngaihpawimawh zual zingah a tel tih a sawi.
Aizawl khawpuiah ngei G20 Forum chhungah Business 20 (B20) hlawhtling taka nghah a ni tih sawiin, ram chhung hmundangte leh ram dang atanga lokal mithiam rualten an tawnhriat atangte in thil tam tak ram mipui min hrilh a, kan hriat loh tam tak kan hriat belh tih minister hian a sawi a. Sumdawng lian tak tak ten Mizorama sum peipun theihna kawng pawimawh tak nia a hriat thu a sawi.
“Act East Policy avanga Mizoram chhimlam kawtchhuaha ram dangte nen insumdawn tawnna tur ruahmanna siam mek pawh hma a sawn zel a, a dawngsawngtu tur Mizoram mipui kan inpeih a ngai,” Lalruatkima hian a ti a. Kan khawtlanga sumdawng liante an lo luh hunah Mizo mipuiin tangkai taka kan chhawr ve theihna’n kan inbuatsaih a ngai a, khawvel hmasawn ruala hma kan sawn ve theih nan kan thiamna tihpun a ngai tih a sawi a ni.
Embassy of France India IT and Sustainable Cities deputy head Feli Visco chuan G20 nihphung sawiin, India ramin president dinhmun a luah chhung hian ram ei leh bar dinhmun siamthat kawng, khawvel ram hrang hrangten harsatna leh chona kan hmachhawn dan turah a ngaihdan thawhah leh, India ramin a vei leh ngaihpawimawh a tarlan theihna tur remchang a ni tih a sawi. G20 president a nihna hi India chuan a la thutak hle a, ram ropui leh pawimawh a nih zia phochhuahna dawhsan pawimawh tak a ni tih a sawi bawk.
G20 hi kum 1999 khan din tan niin, ram 19 leh European Union ramte an tel. Member ram ten president nihna inchelh chhawkin kuminah India hian president nihna changin ram chhung khawpui 55 ah meeting vawi 200 a huaihawt dawn a. Aizawlah pawh B-20 neih a ni tawh. Pachhunga University College Political Science department chuan India ramin president nihna a chelh tangkaina zirchianna’n ni hnih awh national seminar a buatsaih a. Mithiam engemawzatin thupui thlanbik hmangin thu an sawi dawn a ni.