Gareth Southgate a bang

Euro 2024 final-ah Spain hneh lova an tlawm leh tak vangin England manager Gareth Southgate chuan a hna a bansan. FA chuan Southgate hmunruak luahtu tur an hmuh thuai an beisei thu an sawi.
Aston Villa player hlui Gareth Souhgate hian kum 2016 atang khan England national team a enkawl tan a, a chetthatpui thawkhat viau. Kum riat a enkawl chhungin England hi Euro final vawihnih a hruai thleng a, vanduaithlak takin an champion zo lo ve ve. Wembley Stadium-a khelh Euro 2020 final-ah Italy laka goal an thun hmasak zet hnuin penalty shoot-out ah an vanduai a, Euro-ah a vawi khat nan champion nih an tumna an puitlin zo lo. Euro 2024-ah hmuhnawm takin khel lem lo mah se an tlo riau thung a, final an thleng. Champion tura rinkai ber Spain lakah 2-1 in an tlawm a, an champion zo lo nawn leh.
Euro 2024 final ah Spain hneh lova an tlawm hnu lawk khan Southgate hi a hma lam hun tur zawh a ni a. Hemi tum hian chhang thui duh lovin, “hun hreawm tak kan tawk mek a, hma lam hun tur ngaihtuah a, thutlukna siamna hun tha a la ni chiah lo. Rawn tur dik kan rawn ang a, thutlukna dik kan siam ngei ka ring”, tiin zawhna a chhang. Euro final-ah an vanduai atanga ni hnih hnu lekah England manager atanga a ban thu puang chiang zui ta a ni.
Kum 53 mi Gareth Southgate hian England hi kum riat a enkawl chhungin inkhel vawi 102 a hmachhawnpui hman. Match 102 atangin vawi 61 a chakpui a, draw vawi 24 an neih bakah tlawm zawkah vawi 17 an tang a. Hnehna an chan zat hi 59.80% zet niin record a nei chhe lem lo hle. Sir Alf Ramsey -a’n World Cup 1966-ah a champion pui hnuin Southgate hi inelna liana England final hruai thleng leh hmasa ber a ni. Euro 2024-ah khan champion se ‘Sir” title a nei zui thei tura ngaih a ni a, vanduaithlak taka an champion zawh loh vangin a hna a kalsan ta thung.
Southgate hian kumin kum tawp thleng contract a la nei a, Euro-ah champion zo lo mah se FA chuan a contract pawhsei sak an rilruk tho a. A hna chelh chhunzawm turin duh viau mah se mi thar tan hmun kian turin ban a thlang ta zawk a ni.
Football a boruak nei lian tak England hian September ni 7 khian UEFA Nations League-ah Republic of Ireland an hmachhawn dawn a, he hunah hian manager thar an neih hman ngei an beisei thu Football Association chief executive Mark Bullingham chuan a sawi.
Tunge England manager thar ni ang??
Gareth Southgate a ban tak vangin England manager thar tur inrinsiakna boruak a hot nghal a, Three Lions manager thar ni tura rinkai zingah manager lar Pep Guardiola leh Thomas Tuchel te hming sawi rik a ni. England manager thar ni tura rinkai zualte tarlang ila.
Lee Carsley
England Under 21 team enkawl mektu Lee Carsley hi Southgate hmunruak luah zo tura ngaih a ni. Kum 2023 khan England U-21 team hi European championship-ah a lo champion pui tawh a, hei vang hian England senior team enkawl tura duh a hlawh zual phah. An manager bang ta Southgate ngei pawh hian kum 2013 leh 2016 inkar khan England under-21 team a lo enkawl tawh a. Lee Carsley hian tha takin Southgate hnung a zui theih beisei a ni. Kum 50 mi Lee Carsley hi Republic of Ireland chuan an manager ni turin an dawr a, England U-21 team enkawl a thlang zawk tlat thung. FA hian hun rei tak daih contract an ziahpui kher lo a nih pawhin an manager atan an rawih rinna lian tak a awm.
Pep Guardiola
Tunlaia manager tha bera ngaih Pep Guardiola hi England tantute chuan an manager thar atan an awt hle. Barcelona leh Bayern Munich te hlawhtling taka lo enkawl tawh a, ropuina rama Manchester City hruai thleng lehtu Guardiola hian City-ah kum 2025 thleng chauh contract a nei tawh a. A contract hman zawh phawt a duh a nih pawhin FA hian lawm taka nghah an thlan a rinawm. England hian player lar tak tak an nei teuh a, Pep Guardiola-a’n a enkawl a nih ngat chuan inelna lianah an champion theih ngei an inting. An buaina ber chu Pep hian England senior team a enkawl duh ang em..tih hi a ni.
Eddie Howe
AFC Bournemouth a chetthat pui vangin FA chuan Eddie Howe hi an manager ni turin tunhma lam khan an lo dawr daih tawh a, an dawr hlawhtling lo. Bournemouth a chetthatpui hnuin Newcastle United a chetthatpoui leh viau a, Champions League khel turin a tlinpui hial nghe nghe. Hei vang hian FA chuan Howe hi an manager thar atan an awt leh zual.
Kum 46 mi Eddie Howe hian St James Park-ah kum 2027 thleng cham turin contract a la nei a. Newcastle-ah conract sei tak a la nei hian FA ngaihtuahna a tibuai dawn thung. An manager atan an ruai dawn a nih chuan zangnadawmnaah sum hlawm an thehchhuah ngei a tul ang.
Jurgen Klopp
Liverpool manager hlui Jurgen Klopp hian team enkawl a nei lo mek a, England tan hmin awlsam lai a ni mai thei. Klopp hian Liverpool a chhuahsan hnuin sawmtu a nei neuh neuh a, USA in an manager ni tura an sawmna a hnar a. Germany in an manager thar ni turin awt viau mah se an la hmin thei lo bawk. Team enkawl nei lova hahdam rih a duh a, amah sawmtute a la hnar zel rih. England in an sawm a nih chuan ngaihtuahna thar a neih ngei rin a ni a. Klopp an ruai thei a nih chuan England pawhin hma an sawnpui ngei a rinawm hle.
Mauricio Pochettino
Tottenham leh Chelsea enkawl tawhtu Argentine manager Pochettino hi FA in an manager thar ni tura an duh hming langsar zingah a tel. PSG manager hlui Pochettino hian England senior team enkawl a lo chak tawh thin a, FA in an sawm a nih ngat chuan sawm harsa lo viau tura ngaih a ni.
Graham Potter
Chelsea in thla sarih hnu lekah ban bawk mah se Brighton a chetthatpui vangin FA chuan Graham Potter hi an manager thar atan an la