Gaza-a UN team-in puihna thil an dawng thei ta

Gaza-a UN team-in puihna thil an dawng thei ta
Israel-in chawlhkar 11 kawng a dan a phelh hnu ni thumah Gaza Strip-a UN team chuan puihna bungraw phur lorry 90 chuangte thil phurh chu an dawng ta.
Bungaw thleng zingah hian chhangphut, naute chaw leh damdawi thilte niin Kerem Shalom crossing-ah Nilaini zan khan an dawng a, sem darh turin kudamah an dah a. Ningani atang khan chhang urtu tam tak chuan chhang an siam leh thei tan.
UN chuan ni thum hnu daiha an dawn chhan hi Israeli sipaiten kalna tura kawng an ruahman bik him tawk loh vang a nih thu a sawi.
Israeli hian Kerem Shalom kaltlang turin Nilaini khan lorry 100 phalna an pe leh a. Hetih loai hian UN chuang hengte hian ‘ Gaza-a mamawh a phuhruk lo nasa’ niin an sawi.
Mihring maktaduai 2.1-te chu tanpuitu pawl hrang hrangte chuan tlakchham an nei nasa tih an sawi a. Ei tur a vâng a, a awm chhun pawh a to em em niin an sawi.
West Bank awlpui, Palestinian Authority Health Minister Majed Abu Ramadan-a chuan Ningania Geneva-a thuthar lakhawmtute a kawmnaah ‘tam kaihhnawihah’ tun hnaih khan naupang 29 an thi tih a sawi niin Reuters news agency-in a tar lang.
UN-in a puih Integrated Food Security Phase Classification (IPC) pawhin maktaduai chanve vel chu reilo teah tam tur an nih thu an chhut lawk bawk.
Nilaini zan khan UN thupuangtu chuan an team-in ‘Kerem Shalom crossing-ah truck phur 90 vel kan dawng a, Gaza-ah kan thawn lut’ tiin a sawi.
Video darhah pawh lorry-te hi Kerem Shalom atangin Gaza chhim lam kawngpuiah inzuiin an kal tih a lang.
Ningani khan UN-a World Food Programme (WFP) chuan Gaza chhim leh lailia chhang urnate chuan chhangphut an dawn leh hnuah an ur leh tan nghal tih a puang bawk.
Chhangte hi hot meals kitchen kaltlanga sem leh tur a ni.
WFP chuan thil dang lutte hi naute thil leh kham ei tur nei lo naupangte mamawh niin an sem dawn tih a puang bawk.
International Committee of the Red Cross (ICRC) chuan chhim lama Rafah khawpuiah lorry pakhatin damdawi a phurhte chu Red Cross field hospital-ah hlan thlak a ni tih a sawi a, a dang mamawh belh a la ni tih a sawi bawk.
Gaza-a puihna a luh hma khan WFP hotu lian, Antoine Renard chuan Israeli sipaiten kalna tur kawng an tih chu puitu pawlten a hlauhawm an ti a, kawngah mi sual emaw, civil mi riltamten an beih mai an hlau va, an kal thei lawk lo tih a sawi.
Renard-a hian a chhe berah ni tin puihna phur lorry 100 vel a luh pawhin mipuite ei tur mamawhna a phuhru zo hram hram chauh dawn tih a sawi.
UN leh an thawhpuiten ei tur tonne 1,40,000 chuang, lorry 6,000 chuang phur an neih chu Gaza puma chengte ei tur thla hnih daih a nih thu a sawi a, hengte hi Gaza-a lut thei tura inring reng an ni tih a sawi.
UN chuan indona a chhuah hma khan ni tin lorry 500 a lut ziah a, a tam zawk hi sumdawnna atana lak luh a ni.
Israel hian March 2-ah khan Gaza-a puihna leh sumdawnna thil phurh luh a titawp a, chawlhkar hnih hnuah Hamas nena thla hnih inkahhai an puan tawpin sipai nen a che chhua leh nghal bawk.
October 7, 2023-a Hamas-in Israel beia mi 1,200 chuang an thah leh hren tura mi 251 an hruai phuba lak nan Israel-in Gaza-ah a bei zui a. Mi 53,762 thi tawhin heng zinga 16,500 hi naupang an ni tih Gaza-a health ministry chuan a sawi.