US-ah kum 200 chuang an hman tawh penny titawp dawn
US-ah kum 200 chuang an hman tawh penny titawp dawn
US chuan nakum atang hian cent khat thir (coin) siam chhuah a titawp dawn tih Treasury Department-in a puang.
Penny tia an sawi mai thin, kum 200 chuang an lo hman tawh pawisa thirte tihtawp hret hret tumna a ni.
President Donald Trump-a chuan February thlaah tawh khan Treasury Secretary Scott Bessent-a hnenah pawisa thir chher chu titawp tura tiin ‘sum paihna’ tiin a lo sawi tawh.
US-ah hian penny siam nana sum hman leh siam hnua a tangkaina hi rei tak buka sawi awm tawh sa a ni.
January khan Elon Musk-a enkawl, Department of Government Efficiency (Doge) chuan pawisa thir chherna hautak dan X-ah an lo tar lang tawh bawk.
Penny hi US Mint-in pawisa thir a siam hmasak ber niin kum 1793 atanga hman tan tawh a ni a. Tun hnai kum 10 chuang bawr liam ta atang khan pawisa thir pakhat siam nan cent 1.3 atanga 3.69 vel hman niin Treasury chuan a sawi.
Mint chuan a siam chhuah hi an tihtawp chuan kum tin a siamna hmanraw mana an hman thin aiah $ maktaduai 56 vel an hum thei dawn niin an chhut.
Tihtawp duhtute chuan zinc leh darsen pawisa thir siam chhuah hi sum leh tha khawhralna nia an sawi laiin a duh lotute chuan thil man titlawmtu pakhat a ni a, tanpuina thila sum khawnah thawh a remchang bawk niin an sawi ve thung.
Pawisa thir tihtawp a nih dawn chuan sumdawnna thilah a man chu pawisa nawi inkar buai ngai lo tura tihsan hret emaw, tihtlawm hret emaw a ngaih phah dawn niin Wall Street Journal (WSJ) chuan a tar lang.
Ram dangte pawhin pawisa thir siam chhuah hi an titawp nual tawh a. Canada chuan kum 2012-ah khan cent khat thir chu a chherna man a to bakah thil man sang zelah lei theih a neih tlem tak avangin an titawp.
UK-ah chuan miin pawisafai an hman tlem hret hret avangin kum 2024 khan pawisa thir thar an chher lo va, thuneitute chuan tuna a awm sa a tam tawk niin an sawi bawk.
UK Treasury chuan 1p leh 2p thirte chu tihbo a ni chuang lo tih an sawi a; mahse, miin cashless an hmang nasa a, hei vang hian kum eng emaw zat chu 2p thir hi siam chhuah a ni tawh lo tih a sawi.