Gaza-ah tui a lian, baihvaia awm mekte an baihvai zual

Ruah nasa tak sur avanga tui lianin Gaza Strip a tibuai mek a, thlasik intan mek karah chenna tur in nei lo Palestinian sang telte awmna puan inte chu tuiin a chim nasa hle.
Gaza-a cheng mi maktaduai hnih zinga a tam zawk mah chu Israel-in kum hnih chhung a beihna avangin baihvaiin an awm mek a, tam tak chu puan inah khawsain awmna hul mumal nei lo an tam hle bawk.
October thla laihawl atangin inkahhai kalpui ni tawh mah se indonaah Gaza hi a chhiat deuh vek avangin an dinhmun a khirh rih hle.
Palestinian NGOs Network-a an hotu, Amjad Al-Shawa-a chuan hmanhmawh takin mi maktaduai 1.5 vel khawsakna tur puan in thar 3,00,000 an mamawh thu a sawi.
Palestinian Civil Defence Service chuan kar hmasa atanga ruah sur avanga tui lian nasain Thawhlehni thleng khan puan in sang tel a chim a, a then khat chhia a awm nual bawk tih an sawi.
Tui hian lei atanga feet hnih dawn thleng hmun thenkhatah chimin puan in eng emaw zat a la a, field hospital pawh tui lian avang hian a nih dan tur angin a kal theih rih loh phah niin thawktu leh thil thleng hmututen an sawi.
United Nations chuan Thawhtanni khan Gaza-ah hian thlasika mamawh tur thil phurh luh an tum tan tih an sawi a, hetih lai hian Israeli-ten phal zat an neih avangin an duh ang tawkin tanpuitu pawlte an che thei lo.
Hamas kaihhruai Gaza-a thuneitute chuan Israel hian inkahhai inremna an ziah tel angin puihna tam tawk luhtir an phal lo niin an sawi a. Tanpui pawlte pawhin ni tin mamawh lut tur tam tak an phalsak lo niin an sawi ve bawk.
Israel erawh chuan inremna ziah angin thil an kalpui a, Gaza-a puihna lut tur an dang lo niin an sawi a. Tanpuitu pawlte hian an semzai tawk lo va, Hamas-ten an ru tur an veng hneh lo bawk niin an sawi ve bawk a. Hamas hian thil rua puhna hi an pha nasa hle.