Gaza City a beih mekah Israel-in khawpuia let leh phal lo

Gaza City a beih mekah Israel-in khawpuia let leh phal lo
Israeli tank-ten Gaza City lak tuma an beihnaah an um chhuah tawhte an let leh tur vengin a luhna an dang mek a, Defence Minister Israel Katz-a chuan tun hi khawpui chhunga mihring sang tel la awmte hima an insasengna hun tawp a nih tawh thu a sawi bawk.
Israel hian Hamas fighter-te tawmna hmunpui tawp ber nia sawi, Gaza City hi thla hmasa atang khan bei tanin mi chengte chu chhim lama insaseng turin an ti a ni.
Mi chengte chuan tank hmangin Gaza City chhim lam ramri an veng niin Reuters an hrilh a. Khawpui chhuahsan chu an phalsak zel a, ei tur leh awmna tur zawnga chhuakte erawh an let leh an phalsak tawh lo thung tih an sawi.
Israeli Defense Minister Katz chuan, “Tun hi Gaza-a chengten Hamas mite kalsana chhim lam pana an insasengna hun hnuhnung a ni a, IDF-in beihpui a thlak zui tawh dawn a ni,” a ti.
Sipaite hian Nilainia thu an chhuahah Gaza chhim leh hmar thenna, Netzarim Corridor-ah tam zawk an indah tih an sawi a, a bak erawh an sawi zui thui lo.
UN chuan Gaza City-ah hian mi 6,00,000-7,00,000 vel la cheng angin an sawi a, kar liam taah Israeli sipaiten hma lam an pan zel karah mi 4,00,000 vel an chhuak tawh tih an sawi.
Mi cheng thenkhatte chuan Gaza City-a let leh tum tak tam chuan awm hlen an duh niin an sawi.
Israeli thlawhna leh tank-te chuan Gaza City an bei zui zel a. Healthy ministry chuan Israeli-te kahna avangin mi 77 vel an thih belh leh tawh niin an sawi.
Gaza-a health ministry chuan Israel hian leiah thapui an thawh hian damlo leh hliam tuar an tibuai hle a, damdawi in pali khar a ni.
Gaza City-a damdawi in lian ber, Al Shifa chuan an hmunhma beih a nih avangin hna an thawk thei lo tih an sawi a, damlo na tak takte chuan khar a nih mai an hlauthawng hle.
Tar lan tawh thin angin Israel hian October 7, 2023-a Hamas-in Israel beia mi 1,200 vel an thah leh hren tura mi 251 an hruai phuba lain Gaza hi an bei mek a. Kum hnih indona awm tawhah mi 66,000 chuang an thi tawh.