Pakistani Kashmir-a lungawi loh lantirnaah mi pariat thi tawh

Pakistani Kashmir-a lungawi loh lantirnaah mi pariat thi tawh
Pakistani awp chin Kashmir-a ni li chhung tharum thawha lungawi lohna lantirah mi pariat vel an thi tawh tih Ningani khan Pakistani thuneituten an sawi a. Prime Minister Shehbaz Sharif-a chuan buaina hmeh mih a nih theih dan tur ngaihtuahtu tur committee a din.
Eng ang lungawi lohna chiah nge lantir a ni tih pawn lam atang chuan hriat a har hle a, province khawpui, Muzafarabad-ah Thawhtanni khan a chhehvel khuaa cheng sang tel erawh an kal khawm tih erawh hriat a ni.
Thuneituten ram bial pumah phone leh internet an tithi a, heng lai hmun hi kum 1947-a Pakistan leh India a din khan ram pahnih hian an inthunun kawp ve ve a ni.
Police pathum leh civil mi panga an thi tawh niin Islamabad-a venhim hna thawktu pahnihin Reuters an hrilh a. Thawhtannia lungawi lohna lantir a nih atangin mipui leh police hi an innawr nghal a ni.
Pakistani TV leh thuneitute chuan sumdawnna, sikul leh inkalpawhnate pawh ni li chhung a buai phah tawh niin an sawi.
Sharif-a chuan buaina chhuakte chhui turin politician lawkte telna committee a din a, lungawi lote pawh inbe turin a sawm tih a pisa atanga thuchhuah chuan a tar lang.
“Kan Kashmiri unaute harsatna ching fel turin sorkar chu a inpeih reng a ni,” a ti.
Committee-ah hian Planning Minister Ahsan Iqbal-a pawh telin ‘indawrna kaltlangin harsatna awmte chin fel theih nge’ a beisei thu a sawi.
Kashmir-a mihring dikna chanvo humhalhtu pawl tangruala an hotu, Shaukat Nawaz Mir-a chuan mipuiten an ram biala politician, sorkar hnathawk lian leh sorkara mi pawimawhte nuamsa lutuka an khawsa chu an ngaithei lo tih a sawi.
“Damdawi ina damdawi kan mamawh kan thlen pawhin thuneitute hian pawisa a awm loh avangin an neih loh thu an sawi a; mahse, changkang taka khawsak theihna pawisa erawh an nei reng si,” tiin YouTube news channel pakhat, The Kashmir Link hnenah a sawi.
Nikumah pawh khan mipui lungawi lohna lantir avangin mi pali an lo thi tawh a, Sharif-a chuan Rs. vaibelchhe 24 pein an thil phut tihhlawhtlin a tiam a, heng zingah hian chhangphut leh electricity man thenkhat tumsak a tel bawk.