Gaza tuipui kamah lawng chawlhna
US military lawng chuan Middle East pan mekin Gaza tuipui kamah lawng chawlhna lailawk a siam dawn tiin army te chuan an sawi.
He support ship General Frank S Besson hian karkalta Inrinni khan Virginia a military base chhuahsanin Gaza a pan a ni.
A hma lawkin President Joe Biden chuan US chuanG tuipui atanga tanpuina a luh theih nan Gaza-ah lawngchawlhna lailawk a siam dawn tiin a lo sawi tawh a.
UN chuan Gaza Strip a tam tla tur chu dan theih loh tluk a ni tawh a, naupang te chu riltamin an thi tan mek tiin a sawi a.
Lei lam leh vansang atanga tanpuina pekluh chu a hlauhawmin a harsa lutuk bawk si a ni.
World Food Programme chuan lei lam atanga tanpuina a pek chu an convoy ten beih an tawh avangin a thulh lailawk bawk a, chumai bakah kalkawngah lo rawk a ni nasa bawk a ni. Karkalta khan vansang atanga tanpuina thlak thlaka parachute a parh theihloh avangin a hnuaia awm delhin mi panga in nunna an chanphah bawk.
Biden an tuipui atanga Gaza a tanouina pekluh a ni ang a tih atanga darkar 36 chhungin US lawng chuan Gaza a pan hman tiin US Central Command chuan a tarlang.
Pentagon chuan lawng chawlhna lailawk siam turin ni 60 vel hun an mamawh dawn tia sawiin US sipai 1,000 velin buaipuiin tumahin khawmual an rap lo thung ang tiin a sawi a.
Hetihlai hian ei tur 200 tonnes lai phur lawng chuan Cyprus atanga Gaza pan turin phalna a nghak mek bawk a. He lawng Open Arms te hian Thawhtan hian Cyprus atangin Gaza a pan theih beisei a ni.
He lawng hi SPanish charity Open Arms te lawng niin a eitur phurh erawh US charity WorldCentral Kitchen te pek a ni thung a.
US in lawng chawlhna lailawk a siam hma chuan aid delivery te chuan him takin Gaza a lut thei ang em a la chiang lo thung a, a chhan chu Gaza chuan lawngchawlhna mumal a nei lo va, a chhehvel tui te chu lawng lian kalna tur chuan a thuk lo lutuk bawk.
Mahse Open Arms founder Oscar Camps chuan an lawng chawlhna tur chu an la sawi duh loh thu leh an chian thu a sawi a, a hma in tanpuina a luh theih nan World Central Kitchen te chuan lawng chawlhna lailawk an siam sa tawh tiin a sawi.
Nikum 7 October a Hamas tena Israel luta mi 1,200 chuang tihluma mi 253 saltang anga an man hnuah Israel chuan Gaza a run zui avangin Gaza-ah nunna chan 30,900 chuang an awm tawh tiin Hamas te enkawl health mjinistry chuan a tarlang a.
He buaina hian humanitarian crisis turu tak siamin UN chuan Gaza Strip a cheng atanga mi 576,000 vel te chuan ei leh bar an tlachham takzet tawh tiin a sawi a.
Khawthlang ram te chuan Israel chu lei lam atanga tanpuina tam zawkin Gaza a luh theih nana ruahmanna siam turin an nawr reng bawk a. Truck te chuan Egypt thunun Rafah crossing leh Israel thunun Kerem Shalom crossing atangin a lut ve reng a, mahse, Gaza hmar lam chu Israel in a beih mek avangin tanpuina dawng theia siamin a awm lo a ni.
Gaza hmar lamah hian Palestinian 300,000 vel an chenga ngaih niin ei tur leh tui thianghlim an tlachham takzet tawh tia sawi a ni a. Israel chu tanpuina pekluh tikhawbaw tu ah puh niin karkalta khan UN expert te chuan Israel chu Gaza a Palestinian mite laka starvation campaign kalpuiah an puh a ni.
Israel chuan United Nations expert te puhna chu hnawl thungin UN meeting neihnaah pawh an chhuah tauhsan thung.