Gehlot-Pilot buaina vangin Congress chak lo

Kum nga chhung lawih Congress te chuan Chief Minister Ashok Gehlot leh a deputy Sachin Pilot te inkar buaina an ching fel thei lo va, an welfare model fak hlawh em em chuan a chhanchhuak zo lo bawk a. Rajasthan Assembly election a Congress tena seat 31 an hloha 14 lawih chu State khawchhak lam Pilot a community Gujjars te tamna leh awmze neihna hmun a ni.
Kum 2018 a Congress tena thuneihna an chan khan Pilot chu state party president a ni a, Chief Minister post chelh tura ngaih a ni. Mahse, party leadership chuan ngaihdan dang neiin a tum thum nan Ashok Gehlot chu an chief minister tir leh a ni.
July 2020 a Pilot an lungawilohna a lantir atangin Congress chuan harsatna a tawk chho ta char char a, September 2022 phei chuan Gehlot sorkar chu tlu lek lekin a awm hman a. A chhan ber pawh Gehlot thlawptu MLA rual te chuan central leadership in legislator thenkhatte chauh a koha a titipui vang a ni.
Eastern Rajasthan a ding minister panga lai an chak lo va. Chung te chu Vishvendra Singh, Deeg Kumher, Ramesh Meena, Sapotra, Mamata Bhupesh, Sikrai, leh Prasadi Lal Meena, Lalsot te an ni a. Singh leh Meena te hi Pilot thlawptu kum 2020 revolt a MLA 18 zinga tel te an ni a. Pilot telin Gujjar candidate dang 11 te zinga pathum an chak a ni.
Gehlot-Pilot inbeihna chu BJP te tan chanchin duhawm niin vote an hui hiau hiau mai a ni. Inthlan hma ni thum lek a la awm tihin Prime Minister Narendra Modi chuan a campaign speech ah Sachin Pilot a pa Rajesh Pilot chungchang sawiin Gandhi family ten an hrema tunah a fapa an hrem leha a ti a. PM Modi thusawi chuan Gujjar sentiment a khawih hle a, Pilot chu thlauhtlak a nih bakah tihmualpho in a awmah an ngai a ni.
Asssembly election hma in Congress te pink poster State hmun hrang hranga tarah Pilot thlalak chu stamp-size lekin State leh Central leader dang te nena dah a nih laiin Gehlot thlalak erawh lian taka dah a ni a.
Congress president Rahul Gandhi rally ah a tel tihlohah chuan Pilot chu November 16 thlengin a constituency pawnah campaign in a kal lo hrim hrim bawk. Amah thlawptute chuan State leadership in Pilot chu logistical assistance an pe ve lo an ti a. helicopter pe se chuan State hmun hrang hrang a tlawh thei an ti.
Inthlan zawh hnuah pawh mipui te duhthlanna a pawm thu a sawi bak chu Pilot-an engmah a la sawi zui lo bawk a. Mahse, Gehlot nena an inkar chu a la tha lo hle nia ngaih a ni.
“Eastern Rajasthan a chakloh ngawt chhui zui tur a ni lo. Jodhpur, Chief Minister home district ah pawh Congress te chuan seat 10 awmah seat sarih a hloh a ni. Tun hi Congress chaklohna a ni lo, mi pakhat invaivung vang a ni” tiin Pilot hnaihtu Congress hruaitu chuan a sawi.
Rajasthan ah hian central leadership chuan MLA thahnem tak chu dintir tawh loh an duh laiin mahse Gehlot chuan kum 2020 a Pilot hel laia a laka rinawm te chu a hum tlat bawk si a ni.
Hetihlai hian AICC general secretary Jairam Ramesh chuan party vote share tha chu an lawmna a nih thu a sawi a. “Chhattisgarh, Madhya Pradesh leh Rajasthan-ah Indian national Congress a che tha tawk lo va, kan beisei kan pha lo hle a ni. Mahse, vote share zawng chuan Congress te chuan BJP kan hlat lo hle. Hei vang hian beiseina sang tak kan nei a ni” tiin a sawi.
Jairam Ramesh chuan BJP ten Rajasthan-ah 41.7% vote share an neih laiin Congress vote share chu 39.5% a ni tia sawiin engti kawng mahin an inthlau nasa thei lo tiin a sawi bawk.