George Michaelhla hit ‘Careless Whisper’ music video chuan YouTube-ah vawi tluklehdingawn en a hlawh ve ta. He music video hi 1984-a khawvel huapa hla lar kha ni tawh mah se, a music video hi YouTube-ah 2009 khan an upload ve chauh a ni.
A hla hi 80s a lar tawh kha a ni nain, YouTube-a an upload hnuah khawvel huapin cawhrualin nitin vawi 4,00,000 vel en hlawh ang a ni a. A music video-ah hian Michael hian a rangkachak bengbeh leh a suit bakah a trademark hair style te kha a 80s viau nain 80s hla lar YouTube-ah vawi tluklehdingawn en hlawh thei tlemte zingah a tel ta a ni.
A hla lar vanglai hi YouTube awm hma niin, a music video YouTube-a an upload pawh hian tun anga mi nazawngin internet kan duh ang anga kan hman theih hma kha a ni a, tunlai music video te angin YouTube viewer neih tam hi hranghlui ho tan a harsa bik riau a, chuvangin tluklehdingawn en hlawh thei music video neih hi 80s leh 90s star te tan cuan a sak deuh talh tawh a ni.
He ballad hi an tlangzarhna ram a zirin ‘George Michael’ emaw ‘Wham! featuring George Michael’ tiin emaw an dah mai a, Wham! atanga solo lama hlawhtling taka a kal tanna a ni. He hlaa saxophone solo pawh hi lung tileng tham a ni ve tlat. He hla hi ngaihzawng laka rinawm loin, a inchhir thu a puanna hla a ni a, 1984 leh 1985-ah te Billboard Hot 100-ah kar thum chhung a No.1 nghe nghe a ni.
Grammy pahnih dawng tawh, George Michael hian 2016 khan chatuan ram a pan tawh a ni.
George Michael ‘Careless Whisper’-in 1B view a kai
Get real time updates directly on you device, subscribe now.
Next Post