January 18 atanga hman tan, National Girl Child Day kharna chu Thawhlehni khan ram chhung hmun dang rualin Mizoramah pawh hman a ni a. Aizawlah chuan Social Welfare & Tribal Affairs minister Er. Lalrinawma’n a hmanpui.
-- Advertisement --
Mizo nunphunga hmeichhiate dinhmun pawimawh zia Er Lalrinawma hian a sawi a. Chhungkaw hrang hrangah, khawtlang leh veng tinah hmeichhiate mawhphurna a sang hle, tiin, tuna an thlen chinah duhtawk mai loa theihtawp chhuah zel turin a fuih.
Sawrkar laipui leh Mizoram sawrkar pawhin hmeichhiate chanvo humhim leh vawndik a ngaipawimawh hle tih sawiin, “National Girl Child Day hian rah tha chhuah se, mahni nihna leh awmhmunah theuh rahbi thar min rahtirtu ni ngei se, hmeichhe naupang dikna leh chanvo vawnhim sak a, khawvel hmaah hmeichhiate hian kan hnam min chawimawi thei a ni tih lantir a tul a ni,” a ti.
National Girl Child Day pual zirlaite tana lemziaka inelna – primary, middle, high school & higher secondary hrang hrangte tana buatsaiha tithate hnenah minister hian lawmman a sem nghal a ni.
Lungleiah pawh district bawrhsap Kulothungan A hoin National Girl Child Day hi khar a ni a. Bawrhsap chuan ram leh hnamin hma a sawn dawn chuan hmeichhiate dinhmun siamthat chu kan tih makmawh a ni, tiin, hmeichhe naupang an nih avang maiin zirna a ni emaw sports leh thildangah emaw thliarhrang loin theihtawpa tan lakpuitu ni turin mitinte a chah.
Lunglei district-a zirna leh infiamna lama chhuanawm – C. Lalrinfeli, Electrict Veng (Judo – North East level gold, national level bronze medalist) leh Elisian Medaii, Serkawn (Athletics – Mizoram Secondary School Games 2022 Best Girl leh NorthEast represent) te hnenah chawimawi thuziak leh sumfai hlan a ni.