Mizorama kohhran inpumkhatna chungchanga inrawnkhawmna Sap Upa leh Pu Buanga Hall, BCM Hqrs office Serkawn Lungleiah Thawhlehni khan neih a ni.
-- Advertisement --
Inrawnkhawmna hi Synod moderator RevDr C Chawnghmingliana’n a kaihruai a, kohhran inpum-khatna atana thil pawimawh hrang hrang – inpumkhatna pawl hming tur, eng chinah nge inzawmkhawma inpum-khatna kalpui tur, kohhran inzawmkhawmna (Church Council) din a nih theihnan a umzuitu – Steering Committee leh Drafting Committee din rawtnate chu thu ngaihtuah langsar zual a ni.
Church Council din tha an ti a, a ruangam duang turin Drafting Committee siam niin, Mizoram Presbyterian Church (MPC) atangin RevDr K Lallawmzuala leh RevDr Lalhmangaiha, Baptist Church of Mizoram (BCM) atangin leh Rev KV Thanga leh Rev R Lalnunzira, Lairam Isua Krista Baptist Kohhran (LIKBK) atangin RevDr LH Lalpekhlua leh Rev Th. Vanlalzauva, Evangelical Church of Maraland (ECM) atangin Rev P Riabi leh senior executive secretary ni lai, Salvation Army atangin Lt. Colonel Lalhriatpuia leh Lt. Colonel Lalramliana Hnamte te an ni. 2023 May 19-ah a draft thlirho tura thutkhawm a ni anga, Aizawlah Salvation Army-in a thleng ang.
Synod Inkhawmpui 2015-in “Mizoram kohhrante inpumkhatna kawng zawn” tha a tih chu Synod Executive Committee bawhzui atan a dah a. Hemi thu bawhzuina kalzelah missionary din kohhran – PCI, BCM, ECM leh LIKBK te inbiakpui phawt a, a tul angin kohhran pawl dangte sawmkhawm zel nise, tih a ni a. Hemi chungchangah hian kohhran hruaitute inrawnkhawm rawt a ni a, The Salvation Army sawm tel tha tih a ni.
Mizoram Baptist Kohhran Assembly 2021 chuan Mizorama kohhran hrang hrangte inpumkhatna leh thawhhona tha neih zel theih na’n ‘Council of Churches in Mizoram’ din a lo rel tawh bawk a. Kohhran pawl dangte pawhin Mizorama kohhran hrang hrangte inzawmkhawm dan an lo ngaihtuah tawh thin. Hemi ang hian inrawnkhawm hi neih a ni ta a ni.
Inrawnkhawmnaah hian Mizoram Presbyterian Church atangin moderator Rev Dr C. Chawnghming-liana hoin Synod puipa mi 6, Baptist Church of Mizoram atangin president elect Rev KV Thanga hoin mi 8, Evangelical Church of Maraland atangin Rev Dr FC Beichho hoin mi 4, Salvation Army atangin commissioner Lalkiamlova hoin mi 6, Lairam Isua Krista Baptist Kohhran atangin Assembly chairman elect Rev. TC Lalsanghmuna hoin mi 6 an tel a ni.