Go First airline talbuaiin nghawng ngah

Directorate General of Civil Aviation (DGCA) te chuan airlines ten May 15 thleng ticket an pekchhuah tawh loh thu leh an ticket hralh sate pawh pek let leh a nih theih nan hma an la tiin a sawi.
“A vaiin refund kan la pe vek thei lo va, flight cancel avang hian passenger 77,000 a nghawng a ni,” tiin Go Firsy CEO Kaushik Khona chuan a sawi.
“Go First te hian 15 May 2023 thlengin ticket an hralh rih dawn lo va, an hralhsa te pawh refund dan an buaipui mek a ni,” tiin DGCA te chuan May 3 khan eng vangin nge flight an cancel ngawt tiin Go First te chu insawifiah turin a lo ti tawh bawk.
Go First tena chhanna an siam hnuah DGCA te chuan passenger te ticket lei tawh pek let leh dan ngaihtuah turin thu a pe zui a. DGCA te chuan Go First tena flight an kalpui theih loh avanga harsatna a awm loh nan hma an lak zui thu an sawi bawk.
Wadia group ta Go First airlines te hian leiba Rs 11,463 crore vel an nei a, voluntary insolvency resolution proceeding kalpuiin nimin lam khan NCLT Delhi Bench chuan a ngaihtuah tan bawk a.
NCLT a petition an thehluhah budget airline te chuan hun pek ngiatin DGCA te leh supplier te chu an service tibahlah belh zawnga hma la lo turin an ngen a. Airports Authority of India (AAI) te leh private aoirport operator te pawh an parking slot te chhuhsak rih lo turin an ngen bawk a ni. Hei bakah hian airline chuan fuel supplier te pawh fuel la supply reng tura ngenin an contract te titawp rih lo turin an ngen bawk.
Go First hi kum 17 kalta atanga thlawk tawh niin tuna an buaina neih chhan chu Pratt & Shiwtney tena engine an mamawh hunah an pek theih loh vang tia sawiin chuvang chuan an thlawhna zahve zet chu a thlawh theih loh phah an ti a ni.
Go First te leiba neih hi Rs 11,463 crore vel nia ngaih niin heng zingah hian operational creditors default chu Rs 3,856 crore vel a ni a. Aircraft lessor due chu Rs 2,600 crore vel niin NCLT a an thehluhah chuan an tarlang a. April thleng khan an sum pukna laka an leiba bik chu Rs 6,521 crore nia ngaih a ni.