Governor leh kawngsira thil zuartute

Kar kalta Inrinni khan Larsap chuan Tennis Court bulhnai kawngsira thei leh thlai zuartu (street vendors) te a tlawh a. An sumdawnnate hlawk zawka an kalpui theih nana an mamawhte sawipuiin, sawrkar laipuia scheme-te leh street vendor-te hmasawn nana loan puk theihte a hrilh a; social security scheme hrang hrang zawm ve tura fuihin an thiante pawh hrilh chhawng zel turin a chah tih sawrkar thuchhuahah tarlan a ni a.
Governor-in hetianga street vendor-te an inphona hmun ngeiah kalchilh a, an harsatnate sutkianpui dan tur zawnpuia khawchhe hnuaia a thawk chhuak hi thil danglam tak, tunhmaa la thleng zen zen lo a ni a, a thahnemngaihna a fakawm hle a ni.
Governor-in street vendors tana central scheme a sawi pakhat PM-SVANidhi (Prime Minister Street Vendor’s AtmaNirbhar Nidhi) Scheme hi Mizoramah pawh DAY-NULM hmalakna hnuaiah kalpui niin Aizawl khawpui chhunga street vendor 600 chuangin bank loan dilin vendors 500 vel hnenah loan hi pekchhuah a ni tawh tih te hriat a ni a. Hei hi a lawmawm hle rualin, Governor-in a sawi ang hian, sawrkar laipui hnuaia kuthnathawktute hamthatna scheme hrang hrang dangte chhawr tangkai kawngah, state dang aiin kan hnufual deuh niin a lang a, hei hi zau zawka hma la turin a concerned department zelte mawhphurhna a sang hle niin a lang.
PM-SVANidhi pawh hi, khawpui chhunga vendors tam zawkin an chhawr tangkai theih nan tun aia chak zawka hma lak theih ni se a duhawm hle a. Khawpui chhunga Vending Zone siam fel tura tih pawh, hmalakna a rei tawh ngaihtuahin tun thlenga tihfel a la ni lote hi kan Larsap hian hre fuh se chuan, peihfel rang tawh turin a buaipuitute a hrilh ngeiin a rinawm.