Grammy Hall of Fame-a hla seng luh zingah GNR leh Lauryn Hill an tel

March ni 20 khan hla 10 chu Grammy Hall of Fame-ah lakluh an ni a, Hall chei that avanga kum hnih chhung hla thar an seng luh tawh loh hnuah kuminah hla 10-in bul an tan thar leh ta a, kumina hla an seng luh thar zingah hian Guns N’ Roses leh Lauryn Hill te hla pawh a tel.
Kumin Grammy Hall of Fame-a seng luh te hi a genre a darh leh hlawm hle a, neo-soul Lauryn Hill ‘The Miseducation of Lauryn Hill’, EDM Donna Summer ‘I Fell Love’, alternative hip-hop De La Soul ‘3 Feet High and Rising’ atanga Guns N’ Roses ‘Appetite for Destruction’ thlengin a tel.
Kum hmasa lamah chuan kum khatah hla 25 atanga 30 te Hall of Fame-ah hian seng luh thin a ni a, mahse, kum hnih an chawlh chhungin dan thar an siam a ni ngei ang, kuminah chuan hla 10 chauh seng luh a ni ta a, kumina seng luh tur hla neitute hi he Hall of Fame-a an hla pakhat seng luhna tur theuh an ni bawk.
Kumina seng luh tharte pual hian Grammy Museum buatsaihin seng luh inkhawm Grammy Hall of Fame Gala leh concert chu May ni 21 hian NOVO Theater, Los ANgeles-ah neih a ni ang.
Kumina seng luh turte hi singles paruk leh album pali a ni a, album seng luh turte hi a album neitute debut studio album vek niin, Lauryn Hill bakah Buena Vista Social Club, Guns N’ Roses ‘Appetite for Destruction’ leh De La Soul ‘3 Feet High and Rising’ te an ni a, an hlawhtlin dan pawh a inchen lo hlawm khawp mai. GNR ‘Appetite for Destruction hi 2x Diamond-certified album niin, US-ah copy maktaduai 18 chuang an hralh thei a, The Miseducation of Lauryn Hill hi maktaduai 10 an hralh theih laiin, William Bell hla “You Don’t Miss Your Water’ te chu Billboard Hot 100 chart-ah pawh No.95 an kai pha tawk thung.
Grammy Hall of Fame hi 1973 atanga an tih tan niin, he hall of fame-a lak luh ni thei tur chuan hla leh album te chu an tlangzarh atanga kum 25 tal a liam phawt a ngai a, kumina 10 an lakluh thar te nen he hall of fame-ah hian recording 1,152 an lalut tling ta a ni.
Kumin Grammy Hall of Fame inductee-te chu:
William Bell ‘You Don’t Miss Your Water’ (1961)
Buena Vista Social Club, ‘Buena Vista Social Club’ (1997)
De La Soul ‘3 Feet High and Rising’ (1989)
The Doobie Brothers ‘What a Fool Believes’ (1979)
Guns N’ Roses ‘Appetite for Destruction’ (1987)
Lauryn Hill ‘The Miseducation of Lauryn Hill’ (1998)
Wanda Jackson ‘Let’s Have a Party’ (1960)
Kid Ory’s Creole Orchestra ‘Ory’s Creole Trombone’ (1922)
Charley Pride “Kiss an Angel Good Mornin’” (1971)
Donna Summer ‘I Feel Love’ (1977)