Grassroot sports-ah Samagra leh
Sports Council thawk dun dawn
Samagra Shiksha Mizoram (SSM) leh Mizoram State Sports Council (MSSC) chuan Grassroots Sports Development Programme (GSDP) kalpui dan turah Ningani khan Sports & Youth Services minister Lalnghinglova Hmar hriatpuiin inremna – points of agreement an ziak.
SSM leh MSSC hian kumin January 13 khan thawkdun turin thuthlung an lo ziak tawh a. Hemi bawhzuina kalzelah GSDP-a an thawhdun dan tur an tifel leh ta a ni.
Inremnaah hian SSM-in MSSC hnenah a bul tannaah kum khat atan cheng nuai 92 chu an pe anga, programme coordinator leh thawktu pakhat dang MSSC hnenah an awm ang. SSM hian an bungraw mamawh ang an tum bawk ang.
MSSC-in GSDP kalpui leh enkawl an buaipui thung anga, hemi tur hian programme coordinator leh SSM atanga thawktu dangte dah an ni. Trainer leh assistant trainer lak danah SSM leh MSSC hian thu an nei ve ve ang.
GSDP-in a tum ber chu, sawrkar hnuaia school-ah mumal taka sports training kalpui a ni a. Infiamna huang thlan bikah kum 6 atanga 14 inkar zirtir an ni a, theihna nei sangte tan kawng inhawn zelna tura kaihhruai a ni.
He hmalakna hi Mizoram sawrkarin Vision 2036 Olympics a neih mek hnuaia Empowering Mizoram Sports a kalpui nen kaldun thei tura duan a ni.
Grassroot sports-ah Samagra leh Sports Council thawk dun dawn
Get real time updates directly on you device, subscribe now.