Green-Ag project-a inpuih tawn dan tur sawikhawm

Ramngaw humhalh chunga loneituten lo hmun ngelnghet leh an tharchhuah tihniam chuang loa hma an lak theih dan tura hma lak mekna, Green-Ag project-a nodal department bakah a kaihhnawih sawrkar department hoin an puibawm theih dan tur chu Thawhlehni khan Agriculture & Farmers’ Welfare secretary Maria CT Zuali kaihhruaiin sawikhawm a ni.
Ramngaw humhalh kawnga hma lak ho theih dan tur duan a ni a. Prime Minister Dhan Dhanya Krishi Yojanna (PMDDKY) hnuaia scheme hrang hranga tanho dan tur pawh sawi niin, Green-Ag kalphung leh thil tum sawizau a ni.
Thawhho theihna tura duan zingah, chul (fallow land) ramngawa siam leh thuai dan tur; ram leilung tih that theihna tura thlai leh thing chin pawlh dan tur; khuai khawi lama hma lak ho theih dan tur; Mizoram Sloping Agriculture Land Technology (MiSALT) hmanga huan nghet neih dan tur; lei chunglang luangral zel ven kawnga hmalak ho dan tur; a huhoa tui hmanna siam dan tur; damdawi hmang loa lei hanna (nutrients) tih that dan tur; khaw tina ram kang ven dan tur; tur (poison) hmang loa rannung vek thlai ral suattu (biological control) dotua siam; dan loa sa pelh ven dan tur leh a dangte sawiho a ni.
Department aiawh telte chuan kum 2026- 2027 chhunga thawhho theih dan tur sawiho zuiin, thutlukna hrang hrang siam a ni.