Green Mizoram Day

Environment, forest & climate change minister hovin state level sub-committee on Green Mizoram chu nimin khan an thukhawm a, kumina Green Mizoram Day hman dan tur an rel a; thupui atan ‘Thing phun ila, enkawl zui ang u’ tih an thlang a. Green Mizoram Day hi kum 1999 atangin kum tin June ni 11-ah hman thin niin kumin June ni 11 hi Pathianni a nih avangin June 9 atanga hman tur a ni a, a hmun atan Sihphir (Sakwrhmuituai tlang) ruahman a ni a.
Green Mizoram Day hi a hman tan kum nena chhut chuan kum 25 lai a lo ni ve ta reng mai a. Kum 25 chhung khan alo berah kum tin thing nuai hnih vel phun anga chhutin thingtiak nuai 50 zen zawn chu kan phun tawh tihna a ni. A tir lamah khan thingphunte vil zui that a nih thin loh avangin damkhawchhuak an tam lo a, a hnu deuhah vilzui tura tanlak leh a ni a, a hma ai chuan hma kan sawn deuh na a, thingphun damkhawchhuak hi 50% a tling thathum lo maithei. Hei hi kan dinhmun a nih avangin kuminah pawh ‘thing phun ila, enkawl zui ang u’ tih thupui hman a la tul hle tih a lang a ni.
Tuna thing kan phun dan kalhmangah hi chuan, hmun hrang hrangah kan phun darh a, hei hi a that tho rualin, kalphung han her danglam ve deuhte pawh hi a thain a rinawm a. Entir nan, district tin hian Green Mizoram Day denchhenin hmun thlan bikah thingtiak singkhat emaw a aia tam pawh, a remchan dan azirin, an lo puitlin hun pawha hmun khata ngaw deuh khup tham law law turin hmun khatah phun thin ni ta se, a enkawl zui lam pawh a awlsam ang a, chu chu ‘Green Mizoram Park’ tiin a hmun hming chawiin hming puttir thin ni se, chutianga kum tin kan tih a, tha taka kan enkawl zui zel chuan awmzia thui tak a nei ngeiin a rinawm. Kuminah hian a bul tan nan Sakawrhmuituai tlangah thingtiak singkhat vel phun ni ta se, a enkawl zui kawngah pawh sawrkar dept leh pawl hrang hrangte hnatlanga thawh chhuah a remchang zawk ang a, thingphun damkhawchhuak pawh a tam zawk ngeiin a rinawm.