Group A an inching fel, Scotland an tla

Euro 2024 khelh mekah Pathianni zan khan Group A amite an inching fel a, group match hnuhnung ber an khel. Inelna thlengtu Germany chuan Switzerland lakah tlawm an pumpelh hram a, group champion an ni. Germany leh Switzerland ten last 16 an luh laiin Hungary laka tlawm Scotland an tla ve thung.
Germany an him
Inelna thlengtu Germany hian beisei phak baka thain bul an tan a, an khelh hmasak berah 5-1 ngawtin Scotland an sawp. Scotland an sawp hi Euro-a an chak chian ber tum a ni nghe nghe. Scotland an sawp hnuin Hungary an hmachhawn zui leh a, Hungary lakah chak tho mah se beisei ang result erawh an nei thei ta lo. Khelh hnih an chak zawn vangin awlsam takin last 16 an lut a, Euro 2024-ah last 16 lut hmasa ber an ni nghe nghe. Last 16 lut chiang tawh chungin point li hmu tawh Switzerland an hmachhawn a, goal chhuah hmasaah an tang a. Hun pek belha Niclas Füllkrug goal thun hmangin tlawm an pumpelh thei hram a, group champion ni tura an mamawh point khat an hmu. Germany kal chhoh dan hi uluk takin en ila, an khel tha lo hret hret tih a hriat theih a, team lian zawk an hmachhawn hunah an ngaihtuahawm thei viau dawn niin a lang.
Germany leh Switzerland te hi
Frankfurt Arena-ah an inhmachhawn a, inkhel hmuhnawm an lantir. Mualneitu Germany hian bul an tan tha a, goal thun hmasa zawkah an tang. Inkhel tir lama Robert Andrich goal thun chu VAR rawn a nih hnui hnawl a ni. Andrich goal pawm a nih loh hnuin Switzerland an khel tha chhunzawm a, goal thun hmasa zawkah an tang. Dan Ndoye chuan minute 28-naah hmahruaina goal a thun a, Germany a barakhaih.
Julian Nagelsmann a team ten an si phurh sut tumin tan khawh nasa viau mah se a tawp an khar tha thei lo. Switzerland lamin an hmahruaina humhim tuma tan khawh chungin goal thun belh na remchang an zawng ve reng bawk a, Germany tlarhnungte an inhthlahdah thei bik lo. Inkhel hmuhnawm takah hun rei tak chhung goal a luh belh thei lova, Germany an tlawm ngei dawn niin a lang hman.
Tlawm tura ngaih ni tawh mah se Germany an huaisen a, thla thlah lovin an khingpuite an nawr chhunzawm zel a, hun pek belhah an hlawhtling ta nge nge. Bench atanga lut Niclas Fullkrug chuan minute 90+2 ah goal pawimawh tak thunin an si phurh a sut a, Germany tlawm tur a chhan him. Fullkrug goal thun hnu hian goal dang luh belh lovin inkhel a tawp a. Germany chu group champion an ni a. Pahnihna ni chungin Switzerland an tlang chiang nghal bawk.
Scotland an tla
Group A a inkhel dangah last 16 luh beisei zui thei tura chak mamawh pahnih; Scotland leh Hungary te an inkhel a. Last minute a Kevin Csoboth goal thun hmangin Hungary in hnehna lian an chang a, last 16 lut thei dinhmunah an la ding. Hungary in beiseina an la neih laiin Scotland erawh chu table mawngphah niin an tla chiang ve thung.
Steve Clarke team Scotland hi Germany lakah an mualpho hnuin Switzerland lakah an insiamtha a, point khat an hmu. Scotland in point khat an hmuh lai hian Hungary erawh chu vawi hnih an tlawm zawn tawh thung. Hungary an hneh a nih chuan Scotland hian point li an hmu ang a, last 16 an lut zui tura ngaih a ni. Last 16 lut thei dinhmuna ding an nih vangin Scotland hian hnehna chan ngei tumin tan an khawh a, huaisen takin an khingpuite an nawr. Ball chang tam zawk ni bawk mah se Hungary tlarhnung inrem phui tak an su tlang hlei thei lova, hlauhawm an siam tam thei lo. Goal thun tuma tan an khawh vanglaiin bench atanga lut Stuart Armstrong chu Willi Orban chuan box chhugah a titlu a, penalty chawi ngei tura ngaih a nih laiin penalty an hlawhchhuak lo tlat thung a, he thutlukna siam sawi zui a hlawh hle a. Chak mamawh Scotland an lungawi lo zui hle nghe nghe.
Inkhel hmuhnawm leh boruak sang takah hian Hungary forward Barnabas Varga chuan hliam na tak a tuar a, a nunna a derthawng hman hle. He thil thleng vang hian hun pek belh a tam phah a, chu chu Hungary in an hlawkpui. Hun tawp tep minute 90+10-ah Kevin Csoboth chuan Hungary chakna goal a thun. He goal hmang hian Scotland an hnawtchhuak a, point thum hlu tak an hmu.
Hungary hi pathumnaah an awm mek a, team dang result an ngaih chang rih ang a, last l6 lut thei dinhmunah an ding a, an tla thei bawk.