Group YMA-in Teirei lei dawh hna thawh mek enfiah

Taitesena Group YMA chuan Ningani khan Saikhawthlir daia Teirei lei dawh mek, Mizoram PWD Kawrthah Division-in a enkawlna hnuaia SatGuru Engineering & Alied Services (SEAS) hnathawh a hmunah an enfiah.
He lei dawh hi a tira ruahman ang chuan, zawh hun tur a pel daih tawh a; work order chhuah pawh kum 2017 kha niin, contractor hian hna an tan nghal nghe nghe. Mahse a foundation leilung a that loh avang leh fur ruahtui vanga a kotlang a min hek zel avangin an hnathawh a kaltluang thei loa. DPR anga a lei thui zawng (span) metre 80 tura ruahman chu, kum 2018-a tui lian nasain a kotlang a tih min vak avangin kum 2019 ah revise a ni. Revise hnu hian lei sei zawng hi metre 102 niin, sum ruahman chu vaibelchhe 21.75 a ni ta a, hei hi NABARD hnuaia supplementary agreement niin, a behbawm dang pawh la awm tura ngaih a ni.
Lei hlui zawk hi a dotu banpui a min tel avangin thui tak dawhzawm belh a ni tawh a. April 2023 atangin lirthei kal theihna turin traffic hawng leh mah se, lirthei lian (heavy vehicle) load la tan chuan kaltlang chi a la ni chuang lo a ni.
Lei dawh an tan that leh laiin Covid vangin harsatna nasa tak an tawh thu PWD hotute chuan an sawi a. Hna an tharthawh hnu ah sanctioning authority (NABARD) lamin kumin September 30 hmaa zo tura an beisei chu, zawh hman loh turah an ngai tih PWD hian an sawi a, 2024 March 30 hmaa zawh an inbeisei.
Lei dawh hi block thumah then tur niin, abutment wall hnaih ve ve (vaukam tawnah) RCC hmanga dawh tur a ni a, a lai block-ah steel girders an hmang dawn a ni.
Ngawrh taka hna an thawk chung pawh a, an hna a sawt hleihtheih loh chhan zawhna chhangin PWD hotute chuan, lei hlui zawk hnaih taka lei dotu ban khur laih a tul bakah a leilungin a zir loh vangin a min (slip) leh thin niin an sawi a. Chuti chung chuan abutment hi Saikhawthlir leh Bairabi lamah tih zawh a ni tawh. Saikhawthlir lamah hian lei dotu ban chu a nih dan tur ang, metre 8-a thuk laih hnu ah phun a ni a, Bairabi lamah hian a hnuai leilungah dûm a tam vangin metre 13-a thuk laiin, banpui phunna tur an ruahman a ni.
Taitesena Group YMA chuan an hnathawhte uluk taka chhunzawm zel tur leh mipuiin tangkai taka an chhawr thuai theihna’n PWD leh contractor-te an ngen a. An ni pawhin a tha thei ang ber leh chak taka hnathawh an tum thu an sawi. PWD Kawrthah Division EE Lalduhzuala leh hnathawktuten an lo dawngsawng a ni.