Guarantor-a sawrkar tan theihna dan siam hi mipui sawrkar zia lanna

Assembly Session-a dan putluh, a ti tak tak turten loan an puknaa guarantor-a sawrkar a tan theihna tur pawm a ni chu lawmawm an tih thu ZPM party chuan an sawi a. Tun sawrkar chu mipui sawrkar a nih zia lanna a ni tih an sawi.
ZPM Gen. Hqrs. thuchhuak chuan, Assembly Session neih zawh takah thalai, mimal leh company-ten sumdawnna leh mahni kutkawih eizawnna kawnga ke an pen ve theihna tura loan puk duh tana guarantor-a sawrkar a tan ve theihna dan, The Mizoram Ceiling on Government Guarantees (Amendment) Bill 2024 lungrual taka pass a ni chu ropui an tih thu a sawi a. Hei hi tunhma atang tawha chief minister ni ta Lalduhoma’n a lo aupui tawh leh intiamna a ni, tiin, ‘ZPM a sawrkar hnu lawka a intiamna leh a auhla tihhlawhtlina a awm hi thlamuanthlak kan ti a, mahni thutiam leh auhlaa ding chief minister kan nei hi lawmawm kan ti hle,’ a ti.
He dan siamthatah hian thalai zinga sum leh ro dahkham tur nei lo, mahni kea ding chhuak tura a ngaihna hria leh taimate tan zau takin kawng a inhawng tih sawiin, ZPM kaihhruai Mizoram sawrkar chu mipui sawrkar a nih zia a langchiang hle-ah an ngai tih a sawi.
‘The Mizoram Ceiling on Government Guarantees (Amendment) Bill 2024 hi Mizoram sawrkar flagship programe, bana kaih policy (hand holding policy) a hlawhtlin theihna tura kawng pawimawh tak niin, nuai 50 chin loan-ah guarantor-a sawrkar tan, interest free loan pek leh special package loan pekna turah he dan hian kawng a hawng a, miretheite thleng phak dan kan nei ta a ni,’ a ti.
He dan siamthat a move-naah, party thliar loa a ngaihna hria leh mi taimate din chhuahna tura ruahmanna siam a ni tih chief minister-in a puang khan Zoram mipui sawrkar dik tak a ding ta tih a nemnghet tih ZPM thuchhuah chuan a sawi bawk.