May 12, Zirtawpni khan Football Writters’ Association in premier league player tha an thlan result tihchhuah a ni a. Manchester City goal thun khawl Erling Haaland chu FWA Footballer of the year-ah thlan niin chawimawina hmasa a dawng a. Hmeichhe lamah Chelsea player pawimnawh Sam Kerr chuan chawimawina a dawng ve bawk.
Manchester City in Borussia Dortmund atanga an lak Erling Braut Haaland hi EPL-ah a chetha nghal hle a. Season kal mekah goal 35 thunin EPL-ah season khata goal thun hnem ber record a siam hial tawh. Haaland hian City tan inelna hrang hrangah vawi 47 khelin, goal 51 zet a thun tawh bawk. City hi tre-ble champion ni thei dinhmunah an ding mek a, EPL-ah champion theihna hun tha tak an nei a. FA Cup final an luh tawh bakah Champions League-ah pawh champion tura rinkai ber an ni mek. City an chet that nana thawh hlawk tak mai chu Haaland hi a ni.
FWA Footballer of the year 2022 a thlan Haaland hian vote tla zawng zawng atangin 82% zet a hmu phak a. Chawimawina dawng thei tura an chhawpchhuah pathum zinga mi Arsenal player pahnih: Bukayo Saka leh Martin Odegaard te a khum chiang hle. Haaland hi Manchester City player zingah season nga chhunga FWA Footballer of the year Award dawng thei pathumna a ni a. Kum 2018-19 khan Raheem Sterling-a’n he chawimawina hi adawng a. Kum 2020-21 khan Ruben Dias chuan he award hi a lo dawng tawh bawk. Haaland hian chawimawina dang a dawn belh ngei tura ngaih a ni a. City hi champions league-ah an champion a nih phei chuan chawimawina hlu zawk dawng ngei tura ngaih a ni.
Hmeichhe lamah chuan he chawimawina kawl mektu Sam Kerr chuan chawimawina a dawng nawn leh a, hmei chhe zingah FWA Footballer of the year chawimawina dawng zawn thei hmasa ber a ni. Chelsea player pawimawh Kerr hian season kal mekah Chelsea tan vawi 34 khelin goal 26 a thun tawh a. Heng zinga goal 10 zet hi Women’s Super League lama a thun a ni nghe nghe. Hmeichhe lamah hian Aston Villa player Rachel Daly chu pahnihna a ni a. Sam Kerr khelhpui Lauren James chu pathumna a ni ve thung.
Haaland tan chawimawina hmasa
Get real time updates directly on you device, subscribe now.
Prev Post
Next Post