Hachhek bial hmasawnna’n BJP MLA nei turin chah

Hachhek biala hmasawnna hrang hrang thlentir turin he bialah MLA atan BJP mi thlantlin a ngai tih BJP National secretary Rituraj Sinha chuan a sawi.
Inrinni khan zan riakin BJP National Secretary, NE coordinator ni bawk hian Mamit district-a khaw thenkhat a tlawh a. Party hruaitute a kawm bakah vantlang inkhawmte a nei. Prime minister Modi kaihhruaina hnuaiah India ramin hmasawnna tamtak a hmu a, Mizoramah pawh nasa takin PM Scheme kan chhawrin a lang, tiin, Mamit bial amite pawhin tun aia nasa zawka PM Modi zar zo an duh a, chhawr an duh a nih chuan an bialah BJP candidate an thlantlin a ngai, tih a sawi.
PM scheme hrang hrang gas connection free, Housing for All, tui connection free, electric connection free, ration free, Modi Health Care Scheme bakah hamthatna tamtak mipui tan, mirethei tan a awm a, tuna an la hmuh ngai loh hmasawnna chu BJP MLA an neih chuan an hmu thei dawn tih a sawi.
Hachhek bial kawng te lutuk leh kawng tha lo chu siamthat a nih dawn bakah hriselna atana inenkawlna tha Hachhek bialin a nei theih dawn bawk avangin, Hachhek bialin hmasawnna a hmuh ngei theihna turin kumin MLA inthlanpuiah BJP MLA an neih a ngai tiin a sawi a ni.