CM lal lutuk thin hi kan tidanglam dawn – Lalduhoma

ZPM a sawrkar a nih chuan sawrkara chief minister lal lutuk thin chu an tidanglam dawn tih ZPM leader Lalduhoma chuan a sawi.
Inrinnia Aizawl East II ZPM Block programme a hmanpuinaah Lalduhoma chuan corruption tihbo an ngaipawimawh em em a, kalphung thar hmangin an do dawn a; chief minister lal lutuk thin pawh kalphung thar hmangin an tidanglam dawn tih a sawi. “Party president leh CM nihna hi mi pakhatin a chelh kawp dawn lo. Works portfolio a khawih ve lo ang. CM-in portfolio a chang dawn lo, tih kan sawi loa, a chan loh theih loh department a awm. Works department a chang dawn lo kan ti a ni. Chu ringawt pawh chu kalphung thar a ni,” a ti.
Lok Ayukta an thuam chak anga, CBI koh luh pawh party PAC-ah an rel tawh tih sawiin, “Kan police kan ring lo tihna a ni lo. Society-a inpawh tak tak, kohhran khata lawi, pawl hrang hranga inhmang za inchhui hi tu tan mah a nuam lo, chutiang ngaihtuah ve lo CBI kan ko lut dawn a ni,” a ti.
ZPM chief minister candidate Lalduhoma chuan sawrkar file muangchang lutuk leh buaithlak thil tam tak a awm tih a sawi a. Huntiam chhung bitukin a chinfel hun an siam anga, chinfel a nih loha complaint-na tur thuneitu sang tak an siam bawk dawn tih a sawi.
“Restricted tender ti tur chuan chance neih a har em em a. A nihna ang taka kan hman chuan restricted tender hmanna tur hi a vang khawp ang. Kan tibo ang kan ti thei ngawt loa, mahse a nihna ang taka kan kalpui dawn avangin restricted tender tih ri hi kan hre khat khawp ang. Mipuiin party sawrkar hi kan ning ut ut tawh a, mipui sawrkar kan duh. Hna lak chungchangah pawh mahni duhsak zawngte thun remchanna Board phuahchawp ang hi kan ti ve dawn lo. Heti lam buaipui tur MPSC kan nei reng a, an kutah a awm mai dawn a ni,” a ti.
Thangthar zingah kalphung tih danglam duh, pawl atchilh lo, thil tak tak duh an tam hle a. Sawrkar tha duh na pawh thalai zingah a lian hle tih ZPM hruaitu hian a sawi a. Anni’n sawrkar an inrin ai mahin party dangin an rinna a nasa zawk tih a sawi bawk.