Halmawi zawrhna bazar kangah dawr 65 vel kang chhia

Halmawi zawrhna bazar kangah dawr 65 vel kang chhia
Fatehpur, Uttar Pradesh-ah Diwali puala halpuah leh halmawi zawrhna atana bazar siam chawpa kangmei chhuakah dawr 65 chuang a kang chhia a, lirthei ke hnih nei thahnem tak a chhe bawk tih thuneituten an sawi.
Cheng vaibelchhe tel man halmawi a chhe bawk a, mi thenkhat hliam tenau tuar an awm nual bawk tih thuneitute an sawi.
Thil thleng hmutute chuan kangmei hi chhun dar 12.30 velah dawr pakhatah a chhuak tan a, electric kal sual palh avanga intan nia an hriat thu an sawi a. A bul dawr chu rang taka man kaiin halmawi an dah khatte chu a puak zui pawp pawp a, a ri pawh a ring a, hei hian a timankai chak zual niin an hriat thu an sawi.
Mipui hlauthawng leh dawr neitute chiai chu an himna zawngin an tlanchhia a, van lamah pawh sang tak thlengin a khu a zam bawk.
Fatehpur SP Anoop Kumar Singh chuan tumah thi an awm lo nia an hriat thu Pathianni zan khan a sawi.
“Kan ngaih pawimawh hmasak chu kangmei thelh mih a ni a. A chhuah chhan hi chhui mek a ni a, tu emaw lo inthlahdah deuh an awm a nih chuan hrem lohvin a chhuak lo vang,” a ti.
Chief Fire Officer (CFO) Jaiveer Singh-a chuan minute 15 atanga 20 vel lek chhungin dawr zawng zawng chu a kang chhe hman vek tih a sawi.
“Dawr 65-70 vel leh lirthei ke hnih nei 24 chuang a kang chhia a, vanneih thlak takin thi em erawh an awm lo hlauh niin kan hria,” a ti.
Kang thelhtute chuan vaivut, tui leh extinguisher hmangin kang hi an thelh tih thuneituten an sawi.
Sumdawng leh dawr nghaktute chuan fire station chu an awmna atanga metre 200 emaw lekah an awm chungin minute 20 dawnah an thleng chauh niin an sawi.
“Bazar siam chawp hi a hma darkar chanve emaw leka hawn tan chauh kha a ni a. Minute 15 lek chhungin engkim a ral nghal vek a. Harsa takin kan nunna him nan kan chhuak thei hram a ni,” tiin tual chhunga sumdawng pakhat, Satish-a chuan a sawi.
Dawr nghaktu pakhat chuan he hmuna dawr hawng tur hian Rs. nuai 8 a sen thu leh a insenna chu engmah lo a ni ta tih a sawi ve bawk.
SP nena a hmun thleng nghal, District Magistrate Ravindra Singh-a chuan, “Kangmei chhuah chhan leh engzat chiah nge hloh a nih hi chhui a ni dawn a. Thil fel lo ti chu na taka hrem a ni ang,” a ti.
Hetih lai hian BJP district president Mukhlal Pal-a chuan ‘vanduaithlak’ a tih thu a sawi a, a thelh hna thawk turin chet a muang deuh niin a sawi a. Thuneitute chu dawrkaite puihna tur pe ngei turin a ngen bawk.