Kum 35 hnuah Austrian naute thlengte inhmu
Kum 35 hnuah Austrian naute thlengte inhmu
Austrian hmeichhe pahnih, Graz chhim lama damdawi ina an pian hlima an nu leh pa an thlengsakte chu kum 35 hnuah an inhmu.
Doris Grünwald leh Jessica Baumgartner te hi October, 1990-a LKH-Uniklinikum, Graz-a piang niin Austrian chanchinbute chuan an tar lang.
A hun hmaa piang ve ve an ni a, an pian hnu lawkah naute pahnih hi an chhungte lo zawk ve ve hnenah pek palh an ni.
Kum 2012 khan Grünwald-i zawk hian thisen a peknaah a thisen chu a nu nen a inan tak loh avangin nu leh paa a neih, Evelin leh Josef te chu amah hringtute an ni lo tih a hre chhuak a ni.
Austrian sorkar broadcaster ORF chuan kum 2016 khan an tichhuak a; mahse, a chhungte zawn hmuh an ni ta chuang lo.
Baumgartner-i hi Herbert leh Monika Derler nupain an enkawl niin ORF-a Thema TV programme chuan a tar lang a. Nau a pai hnuah a thisen chu a nu leh pate nen a inmil lo tih a hriat atangin a nu leh pate hi a hringtute an ni lo tih hre velehin doctor-in thleng palh an ni thei tih a hrilh a ni.
Jessica-i hian Doris-i hi Facebook hmanga bepawpin an inhmu ta a. Laizawn inhmu ang maia an inngaih thu a sawi.
Tun hnaiah an chhungte pawh hi an inhmu a, an chetla hi ORF TV crew-ten video an la nghe nghe.
Derler-i chuan Thema TV programme-ah hian an fanu chu an fa a ni lo tih a hriat tirh chuan a lungchhe hle tih a sawi a. “Mahse, ka ngaihtuah hmasak ber chu Jessica-i hi kan fanu a ni reng dawn tih ka ngaihtuah a, a hnuah Doris-i ka hmu leh a, ani leh a lo hmeltha em em bawk si,” a ti.
Evelin Grünwald-i pawhin, “Ka tan chuan kan chhungkua kan pung sawtah ka ngai,” a ti a. A pasal pawhin, “A nuam ka ti hle a ni,” a ti bawk.
LKH-Uniklinikum-a operations manager, Gebhard Falzberger-a chuan, “Thil kan tisual palh kha pawi kan ti tak zet a ni,” a ti a. Damdawi in hmingin ngaihdam a dil bawk.
Kum 2016 khan Grünwald nupa hian Doris-i lak (adopt) tuma hma lain dan hre mi an rawn a, ani puihna zarah hian zangnadawmna pawm damdawi in atangin an dawng tih Thema chuan a tar lang.
Derler chhungkua pawh hian an fanu anga an ngaih lak theih dan an dap mek a, zangnadawmna pawh an lak ve hmel.