Hamas ten nasa takin Israel bei thut, indona awm mek

Palestinian militant group Hamas tena kar kalta Inrinnia Israel an beih thut vangin Israeli 200 chuangin nunna an chan tawh tiin Israeli Army te chuan an sawi a. prime Minister Benjamin Netanyahu chuan Gaza-a Hamas-te bihrukna chu ‘hnawmhnawk’ a chantir a intiam zui a ni.
Israeli media te chuan rescue servie officials te thusawi lachhawngin nunna chan 250 chuang awmin hliam tuar 1,500 chuang bawkin Inrinnia Hamas te chetlakna chu kum sawm tam chhunga Israel beihna rapthlak ber tiin an sawi a.
Israeli tena an beihletna avangin Gaza Strip-ah a tlem berah mi 313 in nunna an chan a, hliam tuar 1,700 chuang an awm tiin Palestinian Health Ministry te chuan an sawi ve bawk.
Israel leh Palestinian te lakah hian boruak tantak a awm sa reng a, remna awm theih nana inbiakna pawh kum tam tak chhunzawm theih tawh lohin a awm a ni. Tun hnaiah Israel-a far-right sorkar chuan West Bank-ah nasa zawkin settlement construction a kalpui a, hei vang hian Palestinians za tam tak te chu chenna nei lova siam niin hei bakah hian Jerusalem holy site inchuhna chuan boruak tang tak a siam reng a ni.
Hamas te chetlak dan hian Israel chu a barakhaih hle a. Hamas te hian hun rei tak ruahmanna an nei lawk tih chiangin Jewish holiday lai takin an bei a.
Palestinian fighters te chuan Israel chhim lam chu tuipui, ram leh boruak atanga luhchilh tumin an bei a. Israeli khua leh army post te chu an awp hman a, mi tam tak tihlumin Israeli civilian leh sipaite chu an khalhkhawm bawk.
Gaza Strip hi tuipui kama awm niin Palestinian 2.3 million vel awmna niin kum 2007 khan Hamas ten lain parliamentary election neih hnuah an thunun a. Khata tang khan Israel leh Egypt te chuan an hrek zui ta a ni.
Hetih lai hian Hamas militant commander Mohammed Deif chuan Palestinians leh Arab ram te chu Israel nawrchhuak tura an beihna lamah pui turin a ngen a. Zawhna awm ta chu Palestinian occupied West Bank leh East Jerusalem te leh region danga mite chu sawmna chu an chhang dawn em tih a ni.
Israel chuan indona nasa zawk chhuak thei a ni tih a hai lo va, a chhe berah pawh Lebanese group thiltithei tak Hezbollah te chu hnuhluhin an awm thei tih a hai lo.
Hetih lai hian Israeli military chuan sipai tam tak khawm nghalin Gaza chu vansang atangin a bei nghal mek bawk a. Hamas tena Israeli sipai leh civilian an man te chu nakinah tlanna tawktarhah hman an ni dawn tih a chiang bawk.

Hun a awhrei dawn
Israeli military te chuan Hamas te chu Israel ram chhungah tam tak an la awm tiin a sawi a. Hetih lai hian Prime Minister Benjamin Netanyahu chuan Israelis te chu ‘indona hun rei tak hmachhawn’ tura inpuahchah turin a ngen zui nghal bawk.
Hamas te hian Israel chhim lam luhchilhin sipai leh civilian an tihhlum bakah mi tam tak an man bawk a, engzah chiah nge an man hriat a ni lo chungin an tam tham hle nia sawi a ni.
Benjamin Netanyahu chuan Hamas nunrawng ten loh theih lohin indona min barhluih a ni tia sawiin indona chu hun rei lo te chhungin Israeli ram atanga nawrchhuah an nih hnuah tawp maiin chakna kan chang ang a ti a. Israeli sorkar chuan Gaza hnena electricity, fuel leh bugnrua a pek luh thin chu a titawp zui nghal bawk.
Hamas te hian chim lam atangin Inrinni khan Israel ram lutin chutih lai chu Jewish Sabbath leh Simchat Torah festival neih lai tak a ni a. Indaidanna te paltlangin motorbikes, paragliders leh tuipui lam atangin Israel ram lutin Israel Defence Forces (IDF) te chuan Hamas te hi za tel an nih thu sawiin Israel lamah minute 20 vel lek chhungin rocket 3,000 chuang an kap lut hman bawk.

Tute nge Hamas
Israel nasa taka beitute hi Hamas group te niin kum 1987 khan he pawl hi Ahmed Yassin leh Abdel Aziz al-Rantissi te din niin Egyptian Muslim Brotherhood peng ralthuam chelek te an ni. Hamas tih hi Harakat al-Muqawamah al-Islamiyya tihna niin a awmzia chu Islamic Resistance Movement tihna a ni a. ‘Hamas’ tih hrim hrim hi zela (thathona, thahnemngaihna, phurna) tihna a ni a.
Kum 1988 khan Hamas Charter chuan an tum ber chu Palestine te chhuah zalena Israel West Bank leh Gaza Strip-a Islamic State din a ni. Khami kum tawp lamah khan Hamas te chuan Israel tena pre-1967 border atanga a inhnuhdawha Palestinian refugees te an let leh a remti a nih chuan inremna neih an remti ang an ti a.
Chu mai bakah Muslim Brotherhood te nena inzawmna an titawp bawk ang an ti bawk a. Mahse, Israel chuan hei hi awihsak duh lovin Hamas te chu khawvel bum tumah a puh thung.

Hamas : a ruhrel leh thlawptu neih dan
Hamas hian cultural wing, Dawah leh military arm, Izz ad-Din al-Qassam Brigades a nei a. Hamas te hi Iran-in a thlawp tlat niin chumai bakah Iran, Syria leh Lebanon a Islamist group hezbollah tena an thlawp tlat a ni bawk. Heng member tin te hian helai region a US policy chu an dodal vek bawk.
Tuna Hamas te chetlaknaah pawh Iran foreign ministry thuchhuah chuan Hamas te chetlakna chu ‘awpbettute laka Palestinian mite huaisenna’ tiin a sawi a. Haams hian Palestinian territory te bakah Middle East a ram thlawptu a nei bawk a. Iran, Syria leh Yemen te chuan Hamas te beihna chu thlawpin an chhuah thu leh huaisen an tih thu an sawi a, Qatar pawhin Hamas te chetlakna chu Israel thiamloh liau liau a ti bawk. Arab League leh Jordan te pawhin Israel policy sawiselin tuna buaina awm chhan an ti a. Egypt, Morocco leh Saudi Arabia te chuan insumkarna awm se an ti ve thung.
Khawvel huapin Hamas te chu terrorist organisation ah Israel, US, European Union, Canada, Egypt leh Japan ten an puan a ni a. Kum 2018 khan US in Hamas te chetna demna resolution a put luh chu UN General Assembly-ah hnawl a ni thung.

Hamas vs Fatah
Hamas tena Palestinian political scene an luh hnuah Fatah te, Yasser Arafat din te nen an inngeih lo gnhal thung a. Fatah hi kum 1990 chho vela paramilitary organisation anga din niin a hnuah erawh ralthuam tungin UN Security Council resolution zawmin ISraeli State nen 1967 border milin Palestinian State an din thung.
Mahse kum 2004 a Arafat a thih hnuah hmun ruak thuk tak awmin chu chu Hamas-ten an luah ta zawk a ni. Kum 2007 khan Hamas te chuan Fatah nena civil war neiin Gaza Strip a thunun ta zawk bawk a. Hamas te chuan Islamist an intih laiin Fatah te erawhin secularism an chawilar thung.
Pawl pahnih te chu Israel an hmachhawn danah pawh ngaihdan inang lo bawkin, Hamas te chuan armed resistance an kalpui laiin Fatah te chuan inbiaknaa harsatna chinfel an tlangaupui thung. Pawl pahnih te hi tun hnai kum tam tak chhung chu inbakkaih reng an ni bawk a.
Harsatna an neih te chinfel theih nan inbiakna tam tak a tlawlh tawh a. Hamas te hian kum 2021-22 a Palestinian local election pawh an boycott tawh a. Fatah hi tunah Mahmoud Abbas-an kaihruai mekin President of the State of Palestine a ni mek bawk.