Harry Belafonte a thi

Hranghlui zaithiam,
lemchanthiam, producer leh
activist ni bawk, Harry Belafonete chuan kum 96 mi niin, lungphuchawl avangin khawvel a chhuahsan ta. Belafonte hi ‘Day-O’ (The Banana Boat Song) hmanga calypso music chawi lartu niin, a larna le hmingthanna chu civil rights issues leh khawvel hmun hrang hrangah dahbehna tawkten ngaihven an hlawh theih nan a hmang tangkai thin a ni.
Belafonte hi Caribbean-American niin, November 2014 khan Academy of Motion Picture Arts and Sciences chuan Jean Hersholt Humanitarian Award a lo hlan tawh nghe nghe a ni. Pop, jazz leh traditional West Indian rhythms chawhpawlh thiam tak niin, a rimawi career-ah album 30 chuang a tichhuak hman a, 2000 khan Recording Academy chuan Grammy Award-ah Lifetime Achievement Award an hlan tawh bawk.
1956-a a album ‘Calypso’ a hla ‘Day-O’ leh ‘Jamaica Farewell’ te chu a larpui hlea, he album hi US-a album copy maktaduai hralh kai theih hmasak ber niin an sawi nghe nghe a ni. Belafonte hian Revlon Revue TV special, Tonight With Belafonte avangin 1960 khan Emmy a dawng a, African-American performer zinga Emmy dawng thei hmasa ber a ni bawk.
Harold George Belafonte Jr. hi March ni 1, 1927 khan New York-ah a piang a, chungkaw khawsak harsa tak niin, a nu chu mi in tifaia inhlawh tin a ni. 1936-ah Harlem atangin Jamaica-ah an pem a, chutah chuan kum nga vel an awm a, New York-ah kir lehin, George Washington High School-ah a lut a, mahse, high school hi a zir zo lovin U.S. Navy-ah a lut ta a ni.
Sipai atanga a chawlh hnuah a rem rem tawkin a inhlawh kual ve lawp lawp a, entertainer nih chakin chutiang khawng zawh theihna tur chu a melh reng a. Mi apartment repair-naah American Negro Theatre a kal theihna ticket pahnih a dawng a, chutah chuan Sean O’Casey play Juno and the Paycock-ah a changtupa berah an hmang zui ta a ni.
Belafonte hian nupui pathum- nurse Marguerite Byrd, dancer Julie Robinson leh photographer Pamela Frank te a nei a, an la dam vek a, fanu Shari, Gina (an pahnihin actress an ni ve ve) leh Adrienne leh a fapa David (producer) te a nei bawk.