Harsa takin Tsitsipas a chak

Wimbledon 2023 khelh mekah champion tura rinkai zinga mi Stafanos Tsitsipas chuan harsa takin Dominic Thiem a hneh a, second round a lut. Nilai zana inkhel dangah champion lai Novak Djokovic chuan set hloh lovin Jordan Thompson a hneh a, third round a lut ve thung.
First round-ah hming langsar pahnih Tsitsipas leh Thiem te inhmachhawn nghal hian ngaihven a hlawh a, a chak zawk zawkin Andy Murray an hmachhawn zui leh dawn vangin ngaihven an hlawh leh zual sauh bawk. Anni pahnih hi thawhleh zan khan an inhmachhawn a, ruah sur vanga an khelh chhunzawm theih loh vangin nilai zanah an khel nawn leh a, setnga zet khelin, tie-break-ah Greek tlangval Tsitsipas dingchang zawkah a tang thei hram.
A backhand a that em vanga Federer nena khaikhin hlawh hial Tsitsipas hian French Open champion hlui Dominic Thiem lakah bul a tan tha lo viau a, set khatnaah game thum bak a la thei lova, set khatna a hloh nghal. Set hmasa ber a hloh hnuin set hnihnaah a insiamtha a, inkhel hmuhnawm tak an lantir. Set hnihnaah hian game an inlakchhawk zak zak a, break an neih theih loh ve ve vangin tie-break khelh a ngai. Tie-break-ah Tsitsipas a chungnung viau a, Thiem hian point khat bak a hmu thei lova, set a hloh ve thung.
Set khat ve ve an lak hnuin Tsitsipas a khel tha ta viau a, set thumnaah game khat chiah hlohin set a la a, chak a hnaih ta viau. Dinhmun derthawng zawka a din hnuin player tawnhriat ngah Thiem chu huaisen leh tumruh takin a inlan zui a. Set linaah break pawimawh tak a neih chhawr tangkaiin set a la a, 2-2 a ni ta chiah. Set hnih ve ve an lak hnuin deciding set khelh chhunzawm a ni a, deciding set hmuhnawm bik, tie-break hmanga chak tur zawk tihchian ngai a ni zui leh. Set nganaah hian game an inlak chhawk leh zak zak a, break nei thei an awm loh vangin tie-break khelh a ngai. Tie-break-ah pawh an inbei tawk leh viau. Chak zawk tur rinthiam har khawpa an inhnehtawk hnuin Tsitsipas chuan 10-8 in set a la ta hram a. Grand Slam champion hlui Dominic Thiem lakah 3-6, 7-6 (7-1), 6-2, 6-7 (5-7) ,7-6 (10-8) a hnehna changin second round a lut ta hram a ni.
Harsa taka Thiem hnehtu Tsitsipas chian second round-ah he inelnaa vawi hnih champion tawh Andy Murray a hmachhawn zui leh dawn a, third round lut turin fiahna hautak a hmachhawn leh zet a ngai dawn. World No. 1 hlui Murray hian first round-a a khingpui Ryan Peniston chu set hloh lovin a hneh a. Second-a a khingpui Tsitsipas a paltlang leh thei a nih chuan a vawi thum nan All England-a champion turin inrintawkna sang zawk a nei ang a. Tsitsipas a hneh lo a nih erawh chuan Tennis a chawlhsan zui mai thei thung.
Djokovic a kal zel
Harsa taka Tsitsipas a chak laiin champion lai Novak Djokovic chuan set hloh lovin hnehna a lo chang ve thung a, Nole hi Wimbledon-ah vawi riat champion turin a kal zel a, Grand Slam-ah vawi 24 champion a hnaih deuh deuh zel.
First round-ah set hloh lova lo chak tawh Djokovic hian second-ah Australia player Jordan Thompson a hmachhawn a, inkhel hmuhnawm takah set a hloh lo. Thompson lakah set hloh lo mah se inkhel awlsam a ni lova, awlam taka chak erawh a ni bik lo. Wimbledon-a vawi li zet champion zawn tawh Djokovic hian Thompson lakah tha takin bul a tan a, set khatnaah game thum chauh hloh chungin set a la. Awlsam takin set khatna la mah se set lak belh turin hna hautak tak a thawh a ngai ta thung. Set hnihnaah Thompson a khel tha a, champion lai a ngam ta viau. Set lak tum takin inlan mah se tie-break-a chetha thin Nole lakah a khawng tluan zo lo a, set a hloh nawn leh. Set hnih hloh mah se Thompson a zam lova, set thumnaah a khel tha zui leh viau. Tie-break an khel zui leh mai a rinawm laiin Thompson hian uiawm takin a serve a hum zo lova, set hloh loin champion lai lakah a tlawm ta nge nge. Tichuan, Djokovic chuan 6-3 7-6 (7-4) 7-5 in Thompson a hneh a, third round a lut ta a ni. Djokovic hian Tomas Martin Etcheverry leh Stan Wawrinka te inkhel a chak zawk zawk a hmachhawn zui leh ang.
Result dang
Nilai zana inkhel dangah Tenth seed Tiafoe chuan set hloh lovin Wu Yibing a hneh a, thir round a lut. Thla kaltaah Stuttgart Open-a champion Tiafoe hian China tlangval Wu Yibing hi 7-6 (7-4) 6-3 6-4 in a hneh. Inkhel dangah Paul chuan 7-5 6-3 6-1 in Shintaro Mochizuki a hneh ve bawk. Nilai zana chak zingah Ben Shelton leh Jiri Vesely te an tel.