Harsatna siamtute harsatna zawt

Serchhip district bawrhsap, Competent Authority for Land Acquisition (CALA) ni bawk Paul L Khuma chuan Ningani khan Bungtlang, Keitum leh Sailiam Kawn tlawhin national highway kawngpuiin a paltlang hmunhma a fang a. Mimal leh pawlin harsatna an neihte bakah tunhnai ruahsur nasa avanga hnathawh khaihlak leh harsatna thlengte a hmunah a enpui.
National highway kawngpui zauh hna enkawltu National Highway Infrastructure Development Limited (NHIDCL) hotute leh contractor-te bakah khawtlang hruaituten lo dawngsawngin, an hnathawh tawh chin leh harsatna an neih, an thawh chhunzawm dan tur ruahmanna an lo hrilhfiah a ni.
NH-54 kawng siam meka Serchhip district chhung – Bungtlang, Keitum leh Serchhip Sailiam Kawn inkarah kawng siam la zawhfel loh hmun 13 chu bawrhsap hian a tlawhchhuak a. Zawhfel thuai a nih theih nan chak taka hma lak a nih laiin, kawng siamna dala in lo la awm, a then chu zangnadawmna la tawh sia in lo sa leh, a then chu anmahni in kawta waiting shed sak rem ti lo te an ni.
Bawrhsap leh amah tawiawmtute hian heng chhungkuate hi anmahni chenna in ngeiah dawrin an harsatna tawh dan an sawipui a. Buaina leh harsatna awm loa, hun tiam chhunga thiat turin a hriattir a. Sawrkar tha chakna hmanga tihluihnaa nawrchhiat sak ngai loa, hun an pek belh chhunga thiah ngai ang ang thiat fel turin a ngen a ni.
Bawrsap kaihhruaina hnuaiah NH-54 zauh leh cheithat hna thawktu NHIDCL leh an hnuaia contractor KRAM Infracon. nen karleh hian hnathawh thlirletin, hmalak dan leh hmachhawp an sawiho dawn a ni.