Bangladesh prime minister hlui, Sheikh Hasina-i leh a sorkar paih thlak takin anmahni duh lohna lantirtute tharum nena a ti let chu ‘mihring laka tih dan lohva thil ti vanga pawikhawihna’ a ni thei niin UN chuan a sawi.
UN human rights investigator-te chuan nikuma sorkarin anmahni duh lotute a tih dan chu a rawng lutuk tiin an sawi a, mi 1,400 vel thiin a tam ber hi venhim hna thawktute kutthlaknaah a ni.
UN team chuan ‘sorkar duh lotute beia tharum nena chet’ kha politics hruaitu leh venhim hna thawhnaa hotu liante thupek a ni tih an sawi bawk.
Kum 15 lai sorkarna chelhtu, Hasina-i hi August thla khan a chenna in luhchilh a nih hma lawkin helicopter-in India-ah a tlanchhe zui.
Sorkar laka lungawi lohna kha zirlaite kaihhruaia bul tan niin sorkar hnaa thawk thei hauhsak dan thar kalpui tur an duh lohna atangin a ni a, ram pumah alh chhuakin Hasina-i leh a kaihhruai Awami League party sorkar paih thlak tumnain a zui a, police-in nasa takin an bei let a. Kum 1971-a an ram indan hnua Bangladesh-a tharum thawhna a thlen nasat ber tum niin mi sang chuang an inhliam bawk.
UN investigator-ten an chhuinaah chuan khatih laia sorkar, Hasina-i pawh telin, ‘dan pelin an che’ tih an hmu niin UN human rights chief Volker Türk chuan Geneva-a thuthar lakhawmtute a kawmnaah a sawi.
An thil hmuh chhuah zingah sorkar, venhim hna thawktu leh thil chhuitute chu inthurualin tharum an thawh a, mihring dikna chanvo an palzut ngei tih a tel tih Türk-a chuan a sawi.
Naupangte pawh ngaihhnathiam an ni lo niin an sawi a. Thi mi 1,400 vel zinga 13% chu July 1 leh August 15 inkara thi zingah an tel niin an sawi.
Report puan chhuah hi Bangladesh-a an hruaitu ni lailawk, Muhammad Yunus-a leh a kaihhruai sorkarin an ngenna avanga tih a ni a. Yunus-a hian an ram chu tute pawh him leh zalen taka an chen theihna tura siam ngei an intiam.
UN-in Hasina-i paih thlak tuma beihnaa thi zat an sawi chu tun hnaia sorkarin an sawi aiin 834 zetin an tam bawk.
UN team hian human rights investigator te, forensics physician leh ralthuam lama mi thiamte sawi atangin report hi an siam a. Dam chhuak, thu hretu leh mi dang 230 chuang an kawm a. Damdawi ina enkawlna pek atang te, thlalak, video leh thil dang hrang hrang an hmang bawk.
Hetih laihian Hasina-i cabinet-a tel thin, sorkar nawrtute dawrtu ber ni bawk, Mohammad Ali Arafat-a chuan report-a tar lan zawng zawng chu a dik vek lo tih a sawi ve thung a. UN hnuaia chhuitute thu lakna tam tak chu a rintlak loh niin a sawi.
Sorkar duh lotute beihna bakah hian sorkar lo siam ve tawh thlawptu te, sakhaw thenkhat zuitu leh hnam bil thenkhat beihna a awm bawk nia sawi a ni.
Hei pawh hi an chhui ngei tur thu UN Human Rights Office chuan a sawi.
Hasina-i kaihhruai chet dan pawikhawihna a tling thei – UN
Get real time updates directly on you device, subscribe now.